İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 59 Hüküm no: 10 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın uhdesinde bulunan çörekçi dükkânı gediğinin bir kısmını sattığı Çörekçi Âsitâne-i aliyye’de vâki‘ çörekçi esnâfından olup hâlâ vilâyet-i Anadolu’da medîne-i Kastamonu’da memûren mukīm Kadıoğlu es-Seyyid Mehmed Ağa b. Ali tarafından husûs-ı âti’l-beyânda bâ-hüccet-i şer‘iye vekîl olduğu lede’t-tezkiye adâletleri zâhir ve zeyl-i hüccetde isimleri mezkûr Boyalıoğlu Ali b. Mehmed ve Çukadâr Hüseyin b. Abdullah nâm kimesneler şehâdetleriyle mahzar-ı hasm-ı câhid-i şer‘îde ber-nehc-i şer‘î sâbit ve sübût-ı vekâletine hükm-i şer‘î lâhık olan Dervişoğlu el-Hâc Süleyman b. Mehmed nâm kimesne meclis-i şer‘-i münîrde esnâf-ı mezkûreden işbu bâ‘iseyi’l-kitâb İbrahim b. Osman ve şerîki es-Seyyid İbrahim b. es-Seyyid Ali mahzarlarında bi’l-vekâle ikrâr-ı tâm ve takrîr-i kelâm edip akd-i âti’z-zikrin sudûruna değin müvekkilim merkūm es-Seyyid Mehmed Ağa’nın bâ-hüccet-i şer‘iye yedinde şirâen mülkü olup mahmiye-i mezbûrede Kadırga Limanı kurbünde Bostancıbaşı Ali Ağa mahallesinde câmi‘-i şerîf ve Mehmed Ağa menzili beyninde kâin bir bâb çörekçi dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme yüz yirmi sehm i‘tibâr kılınarak altmış sehmini müvekkilim mezbûrun yedinde ibkā ve altmış sehmini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūmâna ale’l-iştirâki’s-seviyy dört bin dokuz yüz guruşa bi’l-vekâle bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr dört bin dokuz yüz guruşu merkūmân bana tamâmen def‘ ü teslîm ben dahi yedlerinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eyledik fî-mâ ba‘d gedik-i mezkûrun altmış sehminde müvekkilim merkūmun aslâ ve kat‘â alâka ve medhali kalmayıp müşteriyân-ı mezbûrânın mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 13 Şa‘bân sene 1246 Şuhûdü’l-hâl: Kethüdâ Mehmed Sadık Ağa, Sultanmehmedli es-Seyyid el-Hâc Ali Usta, Bahçekapılı İbrahim Usta, Alacahamamlı Hüseyin Usta, Üsküplü el-Hâc Halil Usta