İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 60 Hüküm no: 11 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kömürcü Mehmed Ağa’nın sahibi olduğu kömürcü gediğini diğer Mehmed Ağa’ya sattığı Kömürcü Mahmiye-i İstanbul hısnı ebvâbından Cibâli Yenikapısı dâhilinde Karabaş mahallesinde sâkin Kömürcü el-Hâc Mustafa Ağa b. İbrahim tarafından husûs-ı câ’i’z-zikri ikrâr ve takrîre vekîl olduğu Kömürcü el-Hâc Mehmed Ağa b. Ahmed ve Kömürcü Ömer Ağa b. Mehmed Emin şehâdetleriyle sâbit olan Kömürcü el-Hâc Hasan Ağa b. Ömer meclis-i şer‘-i münîrde işbu bâ‘isü’l-kitâb Kömürcü Mehmed Ağa b. Osman mahzarında bi’l-vekâle ikrâr-ı tâm ve takrîr-i kelâm edip müvekkilim merkūm el-Hâc Mustafa Ağa akd-i âti’z-zikrin sudûruna değin yedimde mülküm olup mahalle-i mezkûre kurbünde Gül Câmi‘-i şerîfi mahallesinde kâin hudûdu ma‘lûm bir bâb kömürcü mağazası derûnunda mevcûde beyne’l-esnâf gedik ta‘bîr olunur on çuval ve iki kürek ve bir kantar ve bir kalbur ve bir çekmece ve bir akçe tahtası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Mehmed Ağa’ya sekiz yüz guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr sekiz yüz guruşu bana tamâmen ve kâmilen def‘ ü teslîm ve ben dahi yedinden bi’t-tamâm ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fî-mâ ba‘d gedik-i mezkûrda benim aslâ ve kat‘â alâka ve medhalim kalmamışdır dedi dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 7 Ramazan sene 1246 Şuhûdü’l-hâl: Halil b. Süleyman, Hüseyin Çelebi b. Yusuf, Kethüdâ-i muhzırân Hafız İsmail Ağa