İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 60 Hüküm no: 12 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hatice Hatun’un arsasını Mehmed Emin Ağa’ya sattığı Mülk arsa mübâya‘ası Mahmiye-i İstanbul’da Zeyrek kurbünde Şah Hubab mahallesinde sâkine ve zâtı zeyl-i vesîkada mektûbü’l-esâmî Müslimîn ta‘rîfleriyle mu‘arrefe olan Şerife Hadice Hacce bt. İbrahim Çavuş meclis-i şer‘-i münîrde işbu bâ‘isü’l-kitâb Mehmed Emin Ağa b. Ali mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde ırsen mülküm olup mahmiye-i mezbûrede Lütfü Paşa kurbünde Defterdâr Ahmed Çelebi mahallesinde vâki‘ etrâf-ı erba‘adan el-Hâc Mustafa Efendi ve Basmacı Ali Ağa ve sebîli menzil ve bahçeleri ve tarîk-i âm ile mahdûd tahmînen doksan zirâ‘ bir kıt‘a mülk arsamı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î [ve safka-i] ile yüz guruşa merkūm Mehmed Emin Ağa’ya bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semen-i mezkûr yüz guruşu müşteri-i merkūm yedinden tamâmen ahz u kabz etmemle ba‘de’l-yevm arsa-i mahdûde-i mezkûrede benim aslâ ve kat‘â alâka ve medhalim kalmayıp merkūm Mehmed Emin Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 21 Ramazan sene 1246 Şuhûdü’l-hâl: Ali Ağa Kâtib-i vekāyi‘, Mehmed Ağa zevc-i bâyi‘a-i merkūme, İsmail Ağa b. Mustafa.