Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 407 Hüküm no: 476 Orijinal metin no: [77a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Andriye’nin borcunun Ebûbekir Odabaşı’ya ödeyen kefillerin Yani’nin mirasçılarını ibrâ ettikleri Bakkal tâifesinden Panayot v. Todori ve Nikola v. Dimo ve Aleksi v. Todori nâm zimmîler meclis-i şer‘-i şerîf-i enverde bundan akdem hâlik olan Yani v. Andriye nâm zimmînin li ebeveyn karındaşı işbu bâ‘isü’l-vesîka Kiryazi nâm zimmî muvâcehesinde her biri ikrâr ve i‘tirâf edip hâlik-i mezbûr Yani’nin Dergâh-ı âlî yeniçerilerinin on altıncı bölüğüne mahsûs oda ahâlîsinin odabaşısı olan gāib ani’l-meclis Ebûbekir Odabaşı’ya yüz on beş guruş deyni olup biz emriyle meblağ-ı mezbûra kefîl olup bi hükmi’l-kefâle deyn-i mesfûru tamâmen malımdan edâ ve teslîm eylediğimden sonra meblağ-ı mezbûru kable’l-edâ mezkûr Yani hâlik olup kıbel-i hükm hâkimü’ş-şer‘î ile meblağ-ı mezbûru bi hükmi’l-kefâle mezkûr Ebûbekir Odabaşı’ya teslîm etmişidik el-hâletü hâzihî mezbûr Kiryazi dahi kendi malından edâ eylediğimiz meblağ mukābelesinde bize teberru‘an yirmi beş [guruş] teslîm biz dahi tesellüm ve kabz edip [77b] ziyâde medfû‘umuza müte‘allika âmme-i da‘vâdan hâlik-i mezbûrun veresesini her birimiz ibrâ ve iskāt eyledik min ba‘d da‘vâ ve nizâ‘ımız kalmadı dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim b. Ahmed, el-Hâc İsmail b. ( ), Yusuf Bey b. Abdullah, Mehmed b. İdris.