İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 61 Hüküm no: 13 Orijinal metin no: [2b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Arif’in semerci kethüdası tayin edildiği Kethüdâ nasbı Âsitâne-i aliyye’de vâki‘ semerci esnâfının kethüdâları olan es-Seyyid Hüseyin Ağa kethüdâlık-ı mezkûrdan bu def‘a azlolunduğuna binâen esnâf-ı merkūmenin mu‘temed ve muhtârları idiği esnâf-ı mezkûreden zeyl-i vesîkada muharrerü’l-esâmî kimesnelerin ihbâr ve iltimâsları ve hâlâ Nâzır-ı İhtisâb-ı İstanbul Hâcegân-ı Dîvân-ı hümâyûn’dan sa‘âdetlü Mehmed Emin Faik Efendi’nin re’yi munzam idiği tarafından mürsel çukadârı Ali Ağa’nın inhâsıyla zâhir olan esnâf-ı merkūmeden işbu bâ‘isü’l-kitâb el-Hâc Mehmed Ârif Ağa b. el-Hâc Ahmed nâm kimesneyi hâkim-i hâsim-i ma‘delet-nisâb-ı mâ-zâle hükmühü câriyen bi’s-savâb efendi hazretleri esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā sebt ü imlâ olundu. Fî 5 Şevvâl sene 1246 Şuhûdü’l-hâl: Ali Ağa b. el-Hâc Mehmed, Hasan Ağa b. Abdullah, el-Hâc Ahmed Ağa b. Ahmed