İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 61 Hüküm no: 14 Orijinal metin no: [2b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Dimitraki’nin uhdesinde bulunan yemeni gediğini Karanfil v. Dimitri’ye sattığı Yemenîci gediği Âsitâne-i aliyye’de vâki‘ yemenîci tâifesinden Anaştaş v. Dimitraki nâm zimmî meclis-i şer‘-i hatîrde abacı esnâfından işbu hâmilü’r-rakīm Karanfil v. Dimitri nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Odunkapısı hâricinde keresteciler karşısında mersûm Karanfil zimmînin abacı dükkânı ittisâlinde kâin şehriye yüz para kirâ-i kadîmeli tahtında bodrumu müştemil bir bâb yemenîci dükkânı derûnunda mevcûde beyne’l-esnâf gedik ta‘bîr olunur üç bıçkı ve bir destgâh ve bir muşta ve beş kalıp ve bir mermer ve bir gürdel ve bir piştahta ve sâir âlât-ı lâzıme-i ma‘lûme akd-i âti’z-zikrin sudûruna değin müstakıllen bâ-hüccet-i şer‘iye yedimde mülküm olmağla ben ber-minvâl-i muharrer mâlik olduğum âlât-ı lâzıme-i muharrere-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Karanfil zimmîye iki bin yedi yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr iki bin yedi yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Karanfil zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] [Fî 5 Şevvâl sene 1246] Şuhûdü’l-hâl: Kethüdâ-i muhzırân İsmail Ağa, Odacı Hüseyin Çelebi Kâhya Apostol, Nikola v. Kiryazi, Kostandi v. Manol, Hıristo v. Savani, Mihal v. Savati