İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 62 Hüküm no: 15 Orijinal metin no: [3a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzurumlu Ahmed Ağa’nın uhdesinde bulunan bakkal dükkânı gediğine ait hisselerini ortaklarına sattığı Aksaray’da bakkāl Mahmiye-i İstanbul’da Sultanahmed Câmi‘-i şerîfi kurbünde Firuzağa mahallesinde sâkin Erzurumî el-Hâc Ahmed Ağa b. Osman meclis-i şer‘-i münîrde bakkāl tâifesinden işbu bâ‘iseyyü’s-sifr İstefan v. Vasil ve Polici v. Abraham nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûrede Aksaray nezdinde boyacı dükkânı karşısında kâin Ömer Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla on beşer sehmden otuz sehmi mersûmânın ve otuz sehmi Nikola zimmînin ve mâ‘adâ altmış sehmi dahi akd-i âti’z-zikrin sudûruna değin benim bâ-mülknâme-i hümâyûn yedimizde mülkümüz olmağla gedik-i mezkûrdan ben mâlik olduğum altmış sehm hissemi tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmâna üç bin üç yüz guruşa ale’l-iştirâki’s-seviyy bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz edip semen-i mezkûr üç bin üç yüz guruşu bana tamâmen def‘ ü teslîm ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d hisse-i mezkûrede benim aslâ ve kat‘â alâka ve medhalim kalmayıp müşteriyân-ı mersûmânın mülk-i müşterâları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 6 Ramazan sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Ağa Kethüdâ-i muhzırân İsmail Ağa Yazıcı Filibos, Kabzımâl Dimitri, Ustabaşı İsak, Ustabaşı Kiryako