İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 63 Hüküm no: 16 Orijinal metin no: [3a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Polci’nin uhdesinde bulunan bakkal dükkânı gediğine ait hisselerini sattığı Aksaray’da bakkāl Âsitâne-i aliyye’de vâki‘ bakkāl tâifesinden Polci v. Abraham nâm zimmî meclis-i şer‘-i hatîrde yine tâife-i mersûmeden işbu hâmilü’r-rakīm Kiryako v. Yorgi ve Yuvan v. Lazari nâm zimmîler muvâcehelerinde ikrâr-ı tâm ve takrîr-i kelâm edip mahmiye-i İstanbul’da Aksaray nezdinde boyacı dükkânı karşısında kâin Ömer Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Nikola zimmînin ve kırk beş sehmi işbu hâzır bi’l-meclis İstifan zimmînin ve bâkī kırk beş sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla ben ber-minvâl-i muharrer mâlik olduğum hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereklerimin izinleriyle mersûmân Kiryako ve Yuvan zimmîlere iki bin beş yüz yetmiş beş guruşa ale’l-iştirâki’s-seviyy bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i meşrûh iştirâken iştirâ ve temellük ve tesellüm ve kabz ve kabûl edip semen-i mezkûr iki bin beş yüz yetmiş beş guruşu bana tamâmen def‘ ü teslîm ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm hisse-i mezkûrede benim aslâ ve kat‘â alâka ve medhalim kalmayıp müşteriyân-ı mersûmân Kiryako ve Yuvan zimmîlerin mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 11 N sene 1246 Şuhûdü’l-hâl: Eş-şâhidûnü’s-sâbikūn Fakat Ustabaşı Ligori