İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 64 Hüküm no: 17 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal İstifan’ın uhdesindeki bakkal dükkânı gediğine ait hisselerinden bir kısmını sattığı Aksaray’da bakkāl Âsitâne-i seniyye’de vâki‘ bakkāl tâifesinden İstifan v. Vasil nâm zimmî meclis-i şer‘-i hatîrde yine tâife-i mersûmeden işbu bâ‘iseyü’s-sifr Kiryako v. Yorgi ve Yuvan v. Lazari zimmîler muvâcehelerinde ikrâr-ı tâm ve takrîr-i kelâm edip mahmiye-i İstanbul’da Aksaray nezdinde boyacı dükkânı karşısında kâin Ömer Ağa dükkânı denmekle meşhûr bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Nikola zimmînin ve kırk beş sehmi mersûmânın ve mâ‘adâ kırk beş sehmi dahi akd-i âti’z-zikrin sudûruna değin benim bâ-hüccet-i şer‘iye şirâen yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum kırk beş sehm hissemin on beş sehmini yedimde ibkā ve bâkī otuz sehmini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûmân Kiryako ve Yuvan zimmîlere bin altı yüz elli guruşa ale’l-iştirâki’s-seviyy bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr bin altı yüz elli guruşu bana tamâmen def‘ ü teslîm ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d hisse-i mezkûrede benim aslâ ve kat‘â alâka ve medhalim kalmayıp müşteriyân-ı mersûmân Kiryako ve Yuvan zimmîlerin mülk-i müşterâları ve hakk-ı sırfları olmuşdur dediklerinde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 21 N sene 1246 Şuhûdü’l-hâl: Eş-şâhidûnü’s-sâbikūn