İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 64 Hüküm no: 18 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havuzlubostan’da bulunan bostan gediği hisselerinin satışı Havuzlu bostan Kaydı ihrâc-şüd Fî 13 M sene [12]74 Âsitâne-i aliyye’de vâki‘ bahçıvan tâifesinden Nikola v. Yani ve sinn [ü] cüssesinin bülûğa tahammülü olmağla bülûğunu mukırr u mu‘terif olan Yani v. İlya nâm zimmîler vilâyet-i Rumeli’de Ohri kazâsına tâbi‘ Resne karyesinde mütemekkin Hıristo v. Dimitri nâm zimmî tarafından vekîl-i müsecceli Kasımpaşa Yiğitbaşısı Yani v. Tanaş nâm zimmî hâzır olduğu hâlde meclis-i şer‘-i hatîrde mahmiye-i mezbûrede Hocapaşa kurbünde Muhsinzâde Han’ı mütemekkinlerinden işbu bâ‘isü’l-vesîka Gelgeloğlu Sarrâf Bogos v. Ohannes zimmînin sulbî kebîr oğlu ve tarafından husûs-ı âti’l-beyânda tasdîka vekîl-i şer‘îsi Artin nâm zimmî muvâcehesinde her biri ikrâr-ı tâm ve takrîr-i kelâm edip mahmiye-i mezbûre hısnı ebvâbından Kumkapı dâhilinde Nişancı Mehmed Paşa-yı atîk mahallesinde kâin Havuzlu Bostan denmekle şehîr arsası evkāf-ı müte‘addideden muhtelit müvekkil-i mesfûrun bi’l-icâreteyn uhde-i tasarrufunda olan bir kıt‘a bostan derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme ve eşcâr ve mezrû‘ât-ı mütenevvi‘anın dört sehm i‘tibârıyla bir sehmi mersûm Nikola zimmî benim ve iki sehmi mersûm Yani zimmî benim ve bir sehmi dahi gāib-i mesfûrun yedimizde akd-i âti’z-zikrin sudûruna değin şâyi‘an mülkümüz olmağla gedik-i mezkûrdan hissemizi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mersûm Bogos zimmîye yedi bin beş yüz guruşa bi’l-asâle ve bi’l-vekâle bey‘ ü temlîk ve teslîm eylediğimizde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semen-i mezkûr yedi bin beş yüz guruşu müşteri-i müvekkil-i mersûm yedinden bi’t-tamâm ve’l-kemâl ahz u kabz ve bi-kadri’l-hısas beynimizde asâleten ve vekâleten iktisâm edip mebî‘-i mezkûrun tağrîr ve gabnine müte‘allika âmme-i de‘âvî ve kâffe-i mutâlebâtdan müvekkil-i mesfûrun zimmetini şurût-ı müfside ve uhûd-ı mubtıladan berî ve cebr ü kerhden hâlî ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile bi’l-asâle ve bi’l-vekâle ibrâ ve iskāt eyledik fî-mâ ba‘d gedik-i mezkûrda olan hisse-i şâyi‘a-i mezkûrelerimizde bizim ve müvekkil-i mersûmun aslâ ve kat‘â alâka ve medhalimiz kalmayıp müşteri-i müvekkil-i mersûm Bogos zimmînin emvâl-i müşterâsı ve hakk-ı sırfı olmuşdur dediklerinde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 5 Şevvâl sene 1246 Şuhûdü’l-hâl: Kethüdâ el-Hâc Süleyman Ağa, Kasımpaşalı Hasan Ağa, Kasımpaşalı Salih Ağa, Kasımpaşalı es-Seyyid Ahmed Ağa, Yedikuleli Hacı Hasan Ağa Denekoğlu Sava, Denkoğlu Lefter, Yiğitbaşı Nikola.