İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 65 Hüküm no: 19 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Erzincanlı Osman’ın uhdesindeki berber dükkânı gediği hisselerinden bir kısmını sattığı Sultanbayezid’de berber Tersâne-i âmire mahbûsâtından Erzincanlı Osman b. Yusuf b. Hüseyin nâm kimesne tarafından husûs-ı âti’l-beyânda ikrâr ü takrîr ve i‘tâ-i hüccete vekîl olduğu Kasımpaşa İskelesi’nde Kayıkçı Erzincanlı es-Seyyid Mehmed b. İbrahim ve Kapan-ı dakīk İskelesi’nde Kayıkçı es-Seyyid Ahmed b. es-Seyyid Ömer şehâdetleriyle sâbit olan yine kapan-ı mezkûrda Kayıkçı Erzincanlı es-Seyyid Mehmed b. es-Seyyid Halil meclis-i şer‘-i münîrde Dîvân-ı âlî çavuşlarından işbu bâ‘isü’l-kitâb Erzincanlı es-Seyyid İbrahim Ağa b. es-Seyyid Mustafa mahzarında bi’l-vekâle ikrâr-ı tâm ve takrîr-i kelâm edip müvekkilim merkūm mahmiye-i İstanbul’da Sultan Bayezid-i velî Câmi‘-i şerîfi avlusu ebvâbından Kürkçülerkapısı karşısında lekeci dükkânı ittisâlinde kâin şehriye dört guruş kirâ-i kadîmeli bir bâb berber dükkânı derûnunda mevcûde ve Başmuhâsebe Kalemi’nde Salih Usta ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin benim bâ-hüccet-i şer‘iye yedimde müstakıllen mülküm olmağla ben ber-minvâl-i muharrer mâlik olduğum gedik-i mezkûrun nısf hisse-i şâyi‘asını yedimde ibkā ve nısf hisse-i şâyi‘asını tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid İbrahim Ağa’ya üç bin beş yüz guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr üç bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm nısf gedik-i mezkûrda benim aslâ ve kat‘â alâka ve medhalim kalmayıp müşteri-i merkūm es-Seyyid İbrahim Ağa’nın mülk-i müşterâsı ve hakk-ı sırfı olmuşdur dedi dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 5 Şevvâl sene 1246 Şuhûdü’l-hâl: Kethüdâvekîli el-Hâc İbrahim Ağa, Şeyh Mustafa Efendi, Du‘âcı İsmail Efendi, Yiğitbaşı el-Hâc Mehmed Nuri Ağa, Kethüdâ-i muhzırân İsmail Ağa, Odacı Hüseyin Çelebi