İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 66 Hüküm no: 20 Orijinal metin no: [4a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Emin ve kardeşi Abdurrahman Efendi’ye ait ev hisselerinin Münire Hanım’a satıldığı Muhtesib Karagöz mahallesinde mülk menzil Hâlâ Devlet-i aliyye-i ebediyyü’l-istimrârda revnak-efzâ-yı mesned-i kethüdâ-i hazret-i sadr-ı a‘zamî sa‘âdetlü semâhatlü atûfetlü es-Seyyid Mehmed Hâdî Efendi hazretleriyle halîle-i muhteremeleri fahrü’l-muhadderât ismetlü Münire Hanım zikri âtî mülk menzilden hisselerini bey‘ murâd edip kendi nefsinden asıl ve li-ebeveyn ammizâdesi olup hâlâ Bosna vâlisi devletlü Namık Ali Paşa hazretlerinin Devâtdârı es-Seyyid Abdülhak Ağa b. Mustafa b. Abdülhâlık tarafından ber-vech-i âtî vekîl olduğu Ahmed Ağa b. Süleyman ve es-Seyyid Hafız Hüseyin Ağa b. Şerîf Abdullah şehâdetleriyle mahzar-ı hasm-ı câhid-i şer‘îde ber-nehc-i şer‘î sâbit olan es-Seyyid Ali Ağa b. es-Seyyid Mehmed Emin meclis-i şer‘-i şerîf-i enverde işbu kitâb-ı sıhhat-nisâbın vusûl-i âyâdî-i kerîmeleriyle şeref-yâb olan müşârün-ileyhimâ es-Seyyid Mehmed Hâdî Efendi b. es-Seyyid Hafız Emrullah Efendi ve Münire Hanım bt. Derviş Mustafa Bey kıbellerinden husûs-ı meymenet-mahsûs-ı câ’i’z-zikri tasdîka vekîl-i şer‘îleri Kethüdâ-i âlî-kadr Mehmed Nazif Efendi b. Mustafa mahzarında bi’l-asâle ve bi’l-vekâle ikrâr-ı tâm ve takrîr-i kelâm edip İslambol’da Muhtesib Karagöz mahallesinde vâki‘ bir tarafdan müvekkilân-ı müşârün-ileyhimânın bi’l-iştirâk uhdelerinde olan sa‘âdethâneleri ve bir tarafdan yine ba‘zen sa‘âdethâne-i mezkûre ile Dârü’l-hadîs medresesi ve bir tarafdan zenciye Mesude Hatun menzili ve bir tarafdan tarîk-i âm ile mahdûd tahmînen bin altı yüz elli dört zirâ‘ arsa üzerine mebnî fevkānî ve tahtânî üç bâb oda ve üç bi’r-i mâ ve eşcâr-ı müsmire ve gayrı müsmireli bahçe ve müştemilât-ı sâire-i ma‘lûmeyi muhtevî bir bâb mülk menzilin üç hisse i‘tibârıyla bir hissesi benim ve bir hissesi müvekkilim merkūmun ve bir hissesi dahi birâderim olup mahrûse-i Bursa’da sâkin es-Seyyid Abdurrahman Efendi’nin yedimizde ırsen mülkümüz olmağla menzil-i mezkûrdan benim ve müvekkilim merkūmun akd-i âti’z-zikrin sudûruna değin mâlikler olduğumuz iki sehm hisse-i mezkûreyi tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve müşterikimiz birâderim gāib-i mezbûrun izn ü icâzetiyle müvekkilân-ı müşârün-ileyhimâ hazretlerine beş bin guruşa bi’l-asâle ve bi’l-vekâle bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr beş bin guruşu bana tamâmen def‘ ü teslîm buyurduklarından sonra akd-i mezkûrda tağrîr ve gabne müte‘allika âmme-i de‘âvî ve kâffe-i mutâlebâtdan müvekkilân-ı müşârün-ileyhimâ hazretlerinin zimmetlerini ibrâ-i âmm-ı sahîh-i şer‘î ve ıskāt-ı tamm-ı sarîh-i mer‘î ile kabûlü hâvî bi’l-asâle ve bi’l-vekâle ibrâ ve iskāt eyledim fî-mâ ba‘d menzil-i mezkûrun iki sehm hisse-i mezkûresinde benim ve müvekkilim merkūmun aslâ ve kat‘â alâka ve medhalimiz kalmayıp müvekkilân-ı müşârün-ileyhimâ hazretlerinin mülk-i müşterâları olmuşdur irâdeleri vechile bi’s-sıhhati ve’l-âfiye temellük ve tasarruf buyursunlar dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 6 min-Şevvâli’l-mükerrem sene 1246 Şuhûdü’l-hâl: Hâcegân-ı Dîvân-ı hümâyûn’dan Osman Ferid Efendi, Türbedâr Abdülhalim Efendi, Hafız İsmail Efendi b. Mustafa, Hafız İbrahim Edhem Efendi b. Hasan, Ali Ağa b. el-Hâc Mehmed