İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 67 Hüküm no: 21 Orijinal metin no: [4a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tatar Mustafa Ağa’nın attar dükkânı gediğini Ömer Ağa’ya sattığı Balıkpazarı’nda attâr Kaydı ihrâc olundu Fî 13 Zilka‘de sene [1]309 Mahmiye-i İstanbul’da Çırçır kurbünde el-Hâc Hasan mahallesinde sâkin attâr esnâfından Tatar es-Seyyid Mustafa Ağa b. es-Seyyid Ali meclis-i şer‘-i şerîf-i enverde na‘lıncı esnâfından işbu bâ‘isü’l-kitâb Ömer Ağa b. Halil mahzarında ikrâr-ı tâm ve takrîr-i kelâm edip mahmiye-i mezbûre hısnı ebvâbından Balıkpazarı kapısı dâhilinde Çiçekçi dükkânı karşısında köşe başında Attâr es-Seyyid Halil Efendi ve Manav Ömer Beşe dükkânları beynlerinde kâin fevkinde bir oda ve tahtında bodrumu müştemil dört kepenk bir bâb attâr dükkânı derûnunda mevcûde beyne’l-esnâf gedik ta‘bîr olunur iki peşkûn ve iki terâzî ma‘a derâhim ve bir kantar ve bir akçe tahtası ve elli kutu ve on beş billûr kâse ve on beş zenbil ve sâir âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakıllen mülküm olmağla ben ber-minvâl-i muharrer mâlik olduğum âlât-ı muharrere-i mezkûreyi tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Ömer Ağa’ya beş bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş bin guruşu merkūm Ömer Ağa bana tamâmen def‘ ü teslîm ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik fî-mâ ba‘d âlât-ı muharrere-i mezkûrede benim aslâ ve kat‘â alâka ve medhalim kalmayıp müşteri-i merkūm Ömer Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 13 Şevvâl sene 1246 Şuhûdü’l-hâl: Na‘lıncılar Kethüdâsı Mustafa Ağa, Yiğitbaşı Ali Ağa, Çavuş Mehmed Ağa, el-Hâc Salih Ağa, Mehmed Tahir Ağa