İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 77 Hüküm no: 32 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Ağa ile Anaştaş zimmînin müştereken uhdelerinde bulunan bakkal dükkânı gediğine ait hisselerini sattıkları Küçükmustafapaşa’da bakkāl Âsitâne-i aliyye’de vâki‘ bakkāl tâifesinin Pazarbaşısı Süleyman Ağa b. Ömer nâm kimesne ile Bakkāl Anaştaş v. Abraham nâm zimmî meclis-i şer‘-i münîrde tâife-i mersûmeden işbu bâ‘iseyü’s-sifr Yani v. Dimitri ve Yorgi v. Yani nâm zimmîler muvâcehelerinde her biri ikrâr-ı tâm ve takrîr-i kelâm edip mahmiye-i mezbûrede Küçükmustafapaşa kurbünde turşucu dükkânı karşısında kâin Pazarbaşı dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi merkūm Süleyman Ağa, benim ve doksan sehmi mersûm Anaştaş zimmî benim akd-i âti’z-zikrin sudûruna değin yedimizde bâ-hüccet-i şer‘iye mülkümüz olmağla her birimiz ber-minvâl-i muharrer mâlikler olduğumuz hisselerimizi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Süleyman Ağa ben hissemi beş yüz guruşa ve mersûm Anaştaş zimmî ben hissemi bin beş yüz guruşa mersûmân Yani ve Yorgi zimmîlere ale’l-iştirâki’s-seviyy bey‘ ü temlîk ve teslîm eylediğimizde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan cem‘an iki bin guruşu bize tamâmen def‘ ü teslîm ve biz dahi yedlerinden bi’t-tamâm ahz u kabz etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d gedik-i mezkûrun otuz sehm hissesinde merkūm Süleyman Ağa benim ve doksan sehm hissesinde mersûm Anaştaş zimmî benim aslâ ve kat‘â alâka ve medhallerimiz kalmayıp müşteriyân-ı mersûmân Yani ve Yorgi zimmîlerin iştirâken mülk-i müşterâları ve hakk-ı sırfları olmuşdur dediklerinde gıbbe’t-tasâduki’ş-şer‘î mâ-vaka‘a bi’t-taleb [ketb olundu] Fî 17 Şevvâl sene 1246 Şuhûdü’l-hâl: Bölükbaşı Abdi Çelebi, Odacı Hüseyin Çelebi Ustabaşı Yani, Yazıcı Filibos, Kabzımâl Dimitri, Ustabaşı Nikola