İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 78 Hüküm no: 33 Orijinal metin no: [6b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nevşehirli Sarraf Hıristo’nun uhdesindeki bakkal gediği hissesini Todori v. Sotiri’ye sattığı Yağcı bakkāl İstanbul’da Büyükyeni Han’da mütemekkin Sarrâf Nevşehirli Hıristo v. Kiryako nâm zimmî meclis-i şer‘-i hatîrde bakkāl tâifesinden işbu bâ‘isü’s-sifr Todori v. Sotiri nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Zindan Kapısı hâricinde vâki‘ Ali Bey nâm-ı diğer Papasoğlu dükkânı denmekle arîf ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yetmiş iki sehmi âharların ve mâ‘adâ kırk sekiz sehmi akd-i âti’z-zikrin sudûruna değin benim bâ-hüccet yedimizde mülkümüz olmağla gedik-i mezkûrun ben ber-vech-i muharrer mâlik olduğum kırk sekiz sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve bâ-izn-i şürekâ mersûm Todori zimmîye beş bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı merkūm beş bin guruşu mersûm Todori zimmî bana def‘ ü teslîm ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm gedik-i mezkûrun hisse-i şâyi‘asından [şâyi‘asında] benim aslâ ve kat‘â alâka ve medhalim kalmayıp müşteri-i mersûm Todori zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 28 Ramazan sene [12]46 Şuhûdü’l-hâl: Bölükbaşı Abdi Çelebi, Pazarbaşı Süleyman Ağa Yazıcı Filibos, Kabzımâl Dimitri, Ustabaşı İsak