İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 78 Hüküm no: 34 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi ile Nikola uhdelerindeki bakkal gediği hisselerini sattıkları Yağcı bakkāl Âsitâne-i aliyye’de vâki‘ bakkāl tâifesinden Yorgi v. Kiryako nâm zimmî tâife-i merkūmeden Nikola v. İstifan nâm zimmî hâzır olduğu hâlde meclis-i şer‘-i hatîr-i lâzımü’t-tevkīrde yine tâife-i merkūmeden işbu hâmilü’r-rakīm İstifan v. Yorgi ve Elisa v. Elisa nâm zimmîler muvâcehelerinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Balıkpazarı Kapısı hâricinde vâki‘ Kara Mehmed dükkânı denmekle meşhûr ma‘lûmü’l-hudûd bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin yüz yirmi sehm i‘tibârıyla otuz sehmi gāib ani’l-meclis Urlu v. Abraham zimmînin ve mâ‘adâ doksan sehmin altmış sehmi benim ve otuz sehmi hâzır-ı mersûm Nikola zimmînin bâ-hüccet-i şer‘iye iştirâken ve şâyi‘an yedimizde emvâlimiz olmağla hâlâ ben âlât-ı gedik-i mezkûrda ber-i‘tibâr-ı merkūm mâlik olduğum altmış sehm ve hâzır-ı mersûm Nikola zimmî kezâlik ber-i‘tibâr-ı merkūm mâlik olduğu otuz sehm hisse-i şâyi‘amızı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bâ-izn-i şerîk-i mersûmân İstifan ve Elisa zimmîlere ale’l-iştirâki’s-seviyy on altı bin beş yüz guruşa bey‘ ü temlîk ve teslîm eylediğimizde onlar dahi ber-vech-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr on altı bin beş yüz guruşu müşteriyân-ı mersûmân benimle hâzır-ı mersûma def‘ ü teslîm eylediklerinde ben ve hâzır-ı mersûm Nikola zimmî dahi yedlerinden tamâmen ve kâmilen ahz u kabz ve bi-kadri’l-hısas beynimizde iktisâm etmemizle mebî‘-i mezkûrun tağrîr ve gabnine müte‘allika âmme-i de‘âvîden ben ve hâzır-ı mesfûr Nikola zimmîden her birimiz müşteriyân-ı mersûmân İstifan ve Elisa zimmîlerin zimmetlerini kabûlü hâvî ibrâ ve iskāt eyledik ba‘de’l-yevm dükkân-ı mezkûr derûnunda mevcûde gedik ta‘bîr olunur âlât-ı lâzıme-i ma‘lûmenin ber-i‘tibâr-ı merkūm doksan sehmi mersûmân İstifan ve Elisa zimmîlerin iştirâki’s-seviyy üzere emvâl-i müşterâtları ve hakk-ı sırfları olup benim ve hâzır-ı mersûm Nikola zimmînin kat‘â alâka ve medhalim[iz] kalmamışdır dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 28 Şa‘bân sene 1246 Şuhûdü’l-hâl: Eş-şâhidûnü’s-sâbikūn