İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 79 Hüküm no: 35 Orijinal metin no: [6b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ketebeden Mahmud Efendi’nin boşadığı hanımının yanında bulunan küçük kızı Şerife Hatice için nafaka ödemesi Nafaka-i sagīre Mahmiye-i İstanbul’da Sofular mahallesinde sâkine ve zâtı zeyl-i kitâbda mektûbü’l-esâmî Müslimîn ta‘rîfleriyle mu‘arrefe işbu râfi‘atü’l-kitâb Şerife Âişe Hanım bt. es-Seyyid Mehmed meclis-i şer‘-i münîrde Bâb-ı hazret-i Seraskerî ketebesinden zevc-i muhâlı‘ı Mahmud Efendi b. Abdülfettah tarafından husûs-ı âti’l-beyânda vekîl olduğu Muhtar-ı evvel Ömer Ağa b. Ali ve Ömer Çavuş b. Mehmed Said şehâdetleriyle sâbit olan el-Hâc İsmail Çavuş Ağa b. Hafız Ali mahzarında takrîr-i kelâm ve bast ani’l-merâm edip müvekkil-i merkūm Mahmud Efendi ile mukaddemâ zevciyyet beynimizde kāime iken mezbûrun firâşından hâsıla ve benden mütevellide ve bi-hakkı’l-hıdâne hâlâ hacr u terbiyemde olan kırk beş günlük sulbiye sagīre kızı Şerife Hadice’nin aslâ mâlı olmayıp nafaka ve kisveye eşedd-i ihtiyâc ile ihtiyâcı olmağla sagīre-i mezbûrenin nafakası’çün babası müvekkil-i merkūm üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim- vâlâ cenâb -veffakallâhu te‘âlâ bi’s-sıdkı ve’s-savâb- efendi hazretleri dahi sagīre-i mezbûrenin nafakası’çün babası müvekkil-i merkūm üzerine işbu târîh-i kitâbdan beher şehr otuzar guruş nafaka bahâ farz ve takdîr buyurup meblağ-ı mefrûz-ı mezkûr beher şehr otuzar guruşu sagīre-i mezbûrenin ancak nafakasına harc ü sarfa ve lede’l-iktizâ istidâneye ve inde’z-zafer babası merkūm Mahmud Efendi üzerine rücû‘a vâlidesi ve hâdinesi mezbûre Şerife Âişe Hanım’a izin vermeğin mâ-vaka‘a [bi’t-taleb ketb ve olundu] Fî 18 Şa‘bân sene 1246 Şuhûdü’l-hâl: Muhtar-ı evvel Salih Efendi, Muhtar-ı sânî İsmail Ağa, Edhem Efendi b. Mehmed, Örücü es-Seyyid Abdülhamid Ağa, Muhzır Molla Hüseyin b. Yusuf ve gayruhum.