İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 80 Hüküm no: 36 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Kostandi’nin uhdesindeki tütüncü gediğini Boyacı Anesti’ye sattığı Tütüncü İhrâc-şüd Fî 23 Ca sene 1282 Âsitâne-i aliyye’de vâki‘ tütüncü esnâfından Yani v. Kostandi nâm zimmî meclis-i şer‘-i hatîrde işbu bâ‘isü’s-sifr Kırkkiliseli Boyacı Anesti v. Kalodi nâm zimmî muvâcehesinde ikrâr-ı tâm ve takrîr-i kelâm edip akd-i âti’z-zikrin sudûruna değin bâ-mülknâme-i hümâyûn yedimde şirâen mülküm olup mahmiye-i merkūmede Muradpaşa Câmi‘-i şerîfi kurbünde na‘lband dükkânı karşısında diğer tütüncü dükkânı ve tarîk-i âm ile mahdûd mâhiye sekizer guruş kirâ-i kadîmeli bir bâb tütüncü dükkânı derûnunda mevcûde Ma‘den Kalemi’nde mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Anesti zimmîye bin yüz guruşa bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr bin yüz guruşu bana def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle fî-mâ ba‘d gedik-i mezkûrda benim aslâ ve kat‘â alâka ve medhalim kalmamağın mebî‘-i mezkûrun tağrîr ve gabnine müte‘allika âmme-i <> de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 17 Şevvâl sene 1246 Şuhûdü’l-hâl: Kethüdâ Mustafa Ağa, Vekîli es-Seyyid Mehmed Ağa, Kâtib Mehmed Efendi, Yiğitbaşı Hafız Ahmed Ağa, İmâmzâde Ahmed Ağa.