İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 81 Hüküm no: 37 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasiliki bt. Nikola’nın uhdesindeki tütüncü gediğini Çukadar İsmail Ağa’ya sattığı Tütüncü Kaydı ihrâc-şüd Fî 16 Safer sene [1]282 Mahmiye-i İstanbul’da Hekimzâde Alipaşa Câmi‘-i şerîfi kurbünde Yenimahalle’de mütemekkine ve şahsı zeyl-i hüccetde muharrerü’l-esâmî Müslimîn ta‘rîfleriyle mu‘arrefe olan Vasiliki bt. Nikola nâm Nasrâniye meclis-i şer‘-i hatîrde işbu bâ‘isü’l-kitâb Çukadâr İsmail Ağa b. el-Hâc Hasan mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye mâlike olduğum mahmiye-i mezbûrede Koska kurbünde nalıncı ve hekîm dükkânları beynlerinde kâin bir bâb tütüncü dükkânı derûnunda mevcûde beyne’l-esnâf gedik ta‘bîr olunur bir peşkûn ve üç billûr kâse ve iki hûni ve iki terâzî ma‘a derâhim ve bir kantar ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm İsmail Ağa’ya bin beş yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin beş yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d âlât-ı muharrere-i mezkûrede benim aslâ ve kat‘â alâka ve medhalim kalmayıp müşteri-i merkūm İsmail Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 21 Şevvâl sene 1246 Şuhûdü’l-hâl: Eş-şâhidûnü’s-sâbikūn