İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 81 Hüküm no: 38 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniko Nasrâniyenin uhdesindeki gedik aletlerini esbak Sadrazam Mehmed Arif’e sattığı Sultanbayezid kurbünde mağaza mübâya‘ası Sadrâzam-ı esbak merhûm ve mağfiret-nişân Halil Hamidpaşazâde devletlü inâyetlü Mehmed Ârif Beyefendi -dâme bi’l-izzi’l-ebedî- hazretlerine zikri âtî âlât-ı gediği bey‘ murâd eden İskerletoğlu Kostaki zevcesi Eleniko bt. Kaplanoğlu Yorgaki nâm Nasrâniye tarafından husûs-ı âtîde ikrâr ve takrîre vekîl olduğu şahsını bilir Suyolcu İsmail b. Hüseyin ve Tulumbacı Mehmed b. Abdullah nâm şâhideyn-i mu‘addileyn şehâdetleriyle ber-nehc-i şer‘î sâbit olan Vâlidehanı’nda mütemekkin Avrupa tüccârından Yorgi v. Vasil nâm zimmî meclis-i şer‘-i hatîrde râfi‘ü hâze’l-kitâb müşârün-ileyh Mehmed Ârif Beyefendi hazretlerinin taraf-ı âlîlerinden husûs-ı âti’l-beyânda tasdîka vekîl-i şer‘îleri Kapıçukadârı İsmail Ağa b. el-Hâc Hasan mahzarında bi’l-vekâle ikrâr-ı tâm ve takrîr-i kelâm edip müvekkilem mersûme Eleniko Nasrâniye müvekkil-i müşârün-ileyh hazretlerinin mütevellîsi olduğu vâlid-i mâcidleri merhûm-ı müşârün-ileyh hazretlerinin evkāf-ı celîleleri musakkafâtından İstanbul’da Sultanbayezid kurbünde Darbhâne fırını karşısında mâ-i lezîz çeşmesi ittisâlinde kâin icâre-i vâhideli ma‘lûmü’l-hudûd bir bâb kârgir mağaza derûnunda mevcûde gedik âlât-ı lâzıme-i ma‘lûme akd-i âti’z-zikrin sudûruna değin bâ-hüccet yedimde mülküm olmağın ben âlât-ı gedik-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i müşârün-ileyh hazretlerine iki yüz elli guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl buyurduklarından sonra semeni olan meblağ-ı mezkûr iki yüz elli guruşu bana mâllarından def‘ ü teslîm ve ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan ben müvekkil-i müşârün-ileyh hazretlerinin zimmetlerini kabûllerini hâvî ibrâ-i âm ile ibrâ ve iskāt eyledim ba‘de’l-yevm gedik-i âlât-ı mezkûrda benim aslâ ve kat‘â alâka ve medhalim kalmayıp müvekkil-i müşârün-ileyh hazretlerinin mülk-i müşterâları olmuşdur keyfe mâ yeşâ tasarruf buyursunlar dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 24 L sene [1]246 Şuhûdü’l-hâl: Kethüdâ-i muhzırân İsmail Ağa b. Mustafa, Hafız İbrahim Edhem Efendi b. Hasan, Ali Ağa b. el-Hâc Mehmed, Rumeli kuzâtından Ahmed Efendi b. Osman, Hamdi Molla b. el-Hâc Salih ve gayruhum.