İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 82 Hüküm no: 39 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nevşehirli Togodoşiye ve ortaklarının uhdelerinde bulunan bakkal gediği hisselerini Bakkal Dimitri’ye sattıkları Bakkāl Fener’de Vilâyet-i Anadolu’da Nevşehir kazâsına tâbi‘ Zile karyesinde mütemekkineler Togodoşiye bt. Hıristo ve Kergeline bt. Danyel ve Mağdani bt. Podetos nâm Nasrâniyelerden mersûme Mağdani Nasrâniyenin zevci ve taraflarından husûs-ı âti’l-beyânda vekîlleri olduğu şahs-ı mersûmâtı bilir Bakkāl Yani v. Luka ve Ligori v. Ergiri nâm zimmîler şehâdetleriyle ber-nehc-i şer‘î sâbit olan Bakkāl Mihal v. Anaştaş nâm zimmî meclis-i şer‘-i hatîrde işbu bâ‘isü’s-sifr Bakkāl Dimitri v. Yani nâm zimmî muvâcehesinde bi’l-vekâle ikrâr-ı tâm ve takrîr-i kelâm edip mahmiye-i İstanbul hısnı ebvâbından Fener Kapısı dâhilinde Abdi Subaşı mahallesinde kalaycı dükkânı ittisâlinde kâin İmâm dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi âharın ve mâ‘adâ altmış sehmi akd-i âti’z-zikrin sudûruna değin zevcem ve müvekkilelerim mersûmâtın bâ-hüccet-i şer‘iye yedlerinde mülkleri olmağla gedik-i mezkûrdan zevcem ve müvekkilelerim mersûmâtın ber-minvâl-i muharrer mâlikeler oldukları hisselerini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide <> ve müşterekleri izniyle mersûm Dimitri zimmîye üç bin iki yüz elli guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr üç bin iki yüz elli guruşu bana tamâmen def‘ ü teslîm ve ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm hisse-i mezkûrede zevcem ve müvekkilelerim mersûmâtın aslâ ve kat‘â alâka ve medhalleri kalmayıp müşteri-i mersûm Dimitri zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 4 L sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Kethüdâ-i muhzırân İsmail Ağa. Yazıcı Filibos, Kabzımâl Dimitri, Ustabaşı İsak, Ustabaşı Ligori.