İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 83 Hüküm no: 40 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Beşe’nin uhdesindeki bakkal gediği hisselerinden bir kısmını Fatma Zehra Hanım’a sattığı Bakkāl, Kapan-ı dakīk Mahmiye-i İstanbul hısnı ebvâbından Kapan-ı dakīk kapısı dâhilinde Papasoğlu mahallesinde sâkine bakkāl esnâfından es-Seyyid Mahmud Beşe b. es-Seyyid Yusuf meclis-i şer‘-i şerîf-i enverde mahmiye-i mezbûrede Hızırbey mahallesinde sâkine bâ‘isetü’l-vesîka zâtı mu‘arrefe Şerife Fâtımatüzzehrâ Hatun bt. es-Seyyid Hüseyin’in zevci ve tarafından husûs-ı âti’z-zikrde tasdîka vekîl-i şer‘îsi Kapudan Giridî Ali Bey [b.] Ahmed mahzarında ikrâr-ı tâm ve takrîr-i kelâm edip mârru’z-zikr kapı dâhilinde Arabacılar nâm mahâlde kâin Ali Pazarbaşı dükkânı denmekle arîf bir bâb ve yine civârında kâin Yenidükkân denmekle ma‘rûf bir bâb ki cem‘an iki bâb bakkāl dükkânı derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmeler akd-i âti’z-zikrin sudûruna değin bâ-hüccet-i şer‘iye yedimde müstakıllen mülküm olmağla ben ber-minvâl-i muharrer mâlik olduğum gedik-i mezkûrların nısflarını yedimde ibkā ve nısf-ı âharlarını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mezbûre Şerife Fâtımatüzzehrâ Hatun’a iki bin yüz elli guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr iki bin yüz elli guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fî-mâ ba‘d gedik-i mezkûrların nısf hisselerinde benim aslâ ve kat‘â alâka ve medhalim kalmayıp müşteriye-i müvekkile-i mezbûre [Şerife] Fâtımatüzzehrâ Hatun’un mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 14 L sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Uncu Hafız Mehmed Ağa b. Eyüb, Hasan Yazıcı b. Ömer ve gayruhum.