İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 84 Hüküm no: 41 Orijinal metin no: [7b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Debbağ Hasan Ağa’nın boşadığı hanımının yanında bulunan küçük çocukları için nafaka ödemesi Nafaka-i sagīretân Mahmiye-i İstanbul’da Tekfur Sarayı kurbünde Çakırağa mahallesinde sâkine ve zâtı zeyl-i kitâbda mektûbü’l-esâmî Müslimîn ta‘rîfleriyle mu‘arrefe <> işbu bâ‘isetü’l-vesîka Şerife Emine Hanım bt. Mustafa Bey meclis-i şer‘-i münîrde zevc-i mutallıkı Debbâğ Hasan Ağa b. Hüseyin mahzarında takrîr-i kelâm ve bast ani’l-merâm edip merkūm Hasan Ağa ile bundan akdem zevciyyet beynimizde kāime iken mezbûrun firâşından hâsılalar ve benden mütevellideler ve bi-hakkı’l-hıdâne hâlâ hacr u terbiyemde olan sulbiye sagīre kızları Şerif Âişe ve Şerife Hasna’nın aslâ mâlları olmayıp nafaka ve kisveye eşedd-i ihtiyâc ile muhtâclar olmalarıyla sagīretân-ı mezbûretânın nafaka ve kisveleri’çün babaları merkūm üzerine kıbel-i şer‘den kadr-ı ma‘rûf meblağ farz u takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakki‘-i sadr-ı kitâb-tûbâ lehû ve hüsnü-meâb- efendi hazretleri dahi sagīretân-ı mezbûretânın nafaka ve kisve-bahâları’çün babaları merkūm Hasan Ağa üzerine işbu târîh-i kitâbdan her birine beher şehr kırk guruşdan cem‘an seksen guruş farz ve takdîr buyurup meblağ-ı mefrûz-ı mezkûr beher mâh seksener guruş sagīretân-ı mezbûretânın nafaka ve kisvelerine harc ü sarfa ve lede’l-iktizâ istidâneye ve inde’z-zafer babaları merkūm Hasan Ağa üzerine rücû‘a vâlideleri ve hâzıneleri mezbûre Şerife Emine Hanım’a izin verilmeğin mâ vaka‘a [bi’t-taleb ketb olundu] Fî 17 Şevvâl sene 1246 Şuhûdü’l-hâl: el-Hâc İsmail Çavuş Ağa, Hafız İsmail Ağa b. Mustafa, Ali Ağa b. el-Hâc Mehmed, Molla Hüseyin b. Yusuf, Mahmud Çelebi el-Muhzır ve gayruhum.