İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 85 Hüküm no: 42 Orijinal metin no: [8a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani Hanım’ın hizmetinde bulunduğu Havva Hanım’daki alacaklarını tahsil ettiği Ücretden ibrâ Mahmiye-i İstanbul’da Çarşambapazarı kurbünde Kovacı Dede mahallesinde vâki‘ Rumeli Kalemi muhzırânından Mehmed Ağa’nın menzilinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe Ümmühânî bt. Abdullah nâm bikr-i bâliğa meclis-i şer‘-i münîrde işbu bâ‘isü’l-kitâb merkūm Mehmed Ağa b. Ahmed tarafından husûs-ı âti’l-beyânda vekîl-i müseccel-i şer‘îsi Rumeli eşrâfından Ali Efendi b. el-Hâc Ali mahzarında ikrâr-ı tâm ve takrîr-i kelâm edip işbu yedimde olup bin iki yüz kırk üç senesi Recebi’l-ferdi’nin ikinci günü târîhiyle müverraha bir kıt‘a hüccet-i şer‘iye nâtıka olduğu üzere ben müvekkil-i merkūm Mehmed Ağa’nın menzilinde zevcesi gāibetü ani’l-meclis Havva Hanım bt. el-Hâc Hasan’a hizmet etmek üzere hâl-i sıgārımda şehriye yirmişer guruş ücret tesmiyesiyle müvekkil-i merkūma kıbel-i şer‘den îcâr ve ücret-i mezkûrenin on ikişer guruşunu işbu târîh-i vesîka şehri Şevvâli’l-mükerremi’nin ikinci gününe gelince otuz dokuz ayda ücret-i müsemmâ-yı mezkûremden müvekkil-i merkūm Mehmed Ağa yedinde mütebâkī olan cem‘an üç yüz yirmi guruşu vekîl-i merkūm Ali Efendi müvekkil-i merkūmun mâlından işbu meclis-i şer‘de bana tamâmen def‘ ü teslîm ve ben dahi yedinden ahz u kabz etmemle bi’l-cümle husûs-ı mezkûra ve müddet-i mezkûrede sebk eden hizmetime ve târîh-i mezkûra gelince sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan müvekkil-i merkūm Mehmed Ağa ile zevcesi gāibe-i merkūmeden her birinin zimmetlerini ibrâ-i âmm-ı sahîh-i şer‘î ile ibrâ ve iskāt eylediğimde vekîl-i merkūm dahi ibrâ-i mezkûrumu kabûl eyledi dedikde gıbbe’t-tasdîki’ş-şer‘î mâ-vaka‘a bi’t-taleb ketb ve imlâ olundu. Fî 12 Şevvâl sene 1246 Şuhûdü’l-hâl: Muhtar-ı evvel Mehmed Tahir Ağa, Hafız İsmail Efendi b. Mustafa, Odacı Hüseyin Çelebi.