Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 408 Hüküm no: 478 Orijinal metin no: [77b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Ali’nin arsasını Hacı Ahmed Ağa b. Mehmed’e sattığı Husûs-ı âti’l-beyânın mahallinde ketb [ve] tahrîri iltimâs olunmağın savb-ı şer‘den irsâl olunan Mevlânâ Ahmed Efendi b. Yusuf mahmiye-i İstanbul’da Abdi Subaşı mahallesi sâkinelerinden Ayşe bt. Ali nâm hâtun menziline varıp zeyl-i kitâbda mastûrü’l-esâmî müslimîn huzûrlarında akd-i meclis-i şer‘-i kavî eyledikde mezbûre Ayşe Hâtun’un zâtını ma‘rifet-i şer‘iyye ile ârifân Süleyman Efendi b. Abdullah ve Hüseyin Çelebi b. Hasan nâm kimesneler ta‘rîfleriyle mu‘arrefe oldukdan sonra meclis-i ma‘kūd-ı mezbûrda, işbu sâhibü’l-kitâb el-Hâc Ahmed Ağa b. Mehmed mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup bir tarafdan benim kendi mülküm ve iki tarafından mezbûr Ahmed Ağa mülkü ve bir tarafdan Hamamcı Kadın demekle ma‘rûfe Hatice Hâtun mülkü tûlen ve arzen bi hesâb-ı terbî‘î yetmiş iki zirâ‘ sed ta‘bîr olunur arsamı mezbûr el-Hâc Ahmed Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘iyye ile otuz kıt‘a esedî guruşa bey‘ ve teslîm ve temlîk ol dahi minvâl-i muharrer üzre iştirâ ve tesellüm ve temellük ettikden sonra semeni olan meblağ-ı mezbûr otuz kıt‘a esedî guruşu mezbûr el-Hâc Ahmed Ağa yedinden bi’t-tamâm ahz u kabz eyledim ba‘de’l-yevm zikr olunan arsa mezbûr Hacı Ahmed Ağa’nın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min Recebi’l-ferd li sene seb‘a ve tis‘în ve elf. Şuhûdü’l-hâl: El-Hâc Süleyman b. Receb, Mustafa Çelebi b. Hasan, Süleyman Efendi b. Abdullah, Ahmed b. Abdullah.