İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 85 Hüküm no: 43 Orijinal metin no: [8a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Şükrü Efendi’nin boşadığı hanımının yanında bulunan küçük oğlu için nafaka ödemesi Nafaka-i sagīr Husûs-ı âti’l-beyânın mahâllinde ketb ü tahrîri’çün savb-ı şer‘-i enverden mezûnen-bi’l-hükm irsâl olunan Kâtib es-Seyyid Mustafa Nazif Efendi mahmiye-i İstanbul’da Karagümrük kurbünde Hadice Sultan mahallesinde vâki‘ Rumeli <> kuzâtı eşrâfından Hasan Şükrü Efendi b. Ali Efendi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde menzil-i mezkûrda sâkine olup zâtı ta‘rîf-i şer‘î ile mu‘arrefe olan bâ‘isetü’l-vesîka Şerife Âişe Hanım bt. es-Seyyid Ali meclis-i ma‘kūd-ı mezkûrda zevc-i mutallıkı mezbûr Hasan Şükrü Efendi mahzarında takrîr-i kelâm ve ta‘bîr-ani’l-merâm edip mezbûr Hasan Şükrü Efendi ile mukaddemâ zevciyyet beynimizde kāime iken mezbûrun firâşından hâsıl ve benden mütevellid ve bi-hakkı’l-hıdâne hâlâ hacr ü terbiyemde olan tahmînen beş yaşında sulbî oğlu es-Seyyid Mehmed Tevfik nâm sagīrin mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafakası’çün babası merkūm üzerine kadr-ı ma‘rûf meblağ farz u takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î kâtib-i mezbûr dahi sagīr-i mezbûrun nafakası’çün babası merkūm üzerine târîh-i kitâbdan bi’t-terâzî beher yevm yüz yirmişer akçe farz ve takdîr buyurup meblağ-ı mefrûz-ı mezkûru sagīr-i mezbûrun nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası merkūm Hasan Şükrü Efendi üzerine rücû‘a vâlidesi ve hâdinesi mezbûre Şerife Âişe Hatun’a izin verdiğini kâtib-i mezbûr mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin ba‘de’t-tenfîz mâ-vaka‘a bi’t-taleb ketb olundu. Fî 25 Şevvâl sene 1246 Şuhûdü’l-hâl: Muhzır Mustafa Çelebi b. Hüseyin, Çukadâr es-Seyyid İbrahim Edhem Ağa b. es-Seyyid Süleyman, Anadolu Kalimi muhzırânından Salih Ağa, Anadolu kuzâtından Abdullah Kâmil Efendi ve gayruhum.