İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 86 Hüküm no: 44 Orijinal metin no: [8a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadayıfçı Hüseyin Ağa’nın uhdesindeki yarım hisse gediğini üvey annesi Zeliha’ya sattığı Kadayıfçı İşbu sebt-i hâmiş olunan hüccetde mezkûrü’l-ism asâkir-i mansûre-i Muhammediye onbaşılarından Hasan Ağa b. el-müteveffâ Kadayıfçı Hüseyin Ağa meclis-i şer‘-i münîrde kezâlik derûn-ı hüccetde ismi mezkûre zâtı mu‘arrefe üvey vâlidesi Zeliha Hatun bt. Hasan mahzarında ikrâr-ı tâm ve takrîr-i kelâm edip derûn-ı hüccetde zikr ve beyân kılınan bir bâb kadayıfçı dükkânı derûnunda mevcûde beyne’l-esnâf gedik ta‘bîr olunan âlât-ı lâzıme-i ma‘lûmenin nısfı benim ve nısf-ı âharı üvey vâlidem merkūmenin akd-i âti’z-zikrin sudûruna değin yedimizde ber-mantûk-ı hüccet mülkümüz olmağla ben gedik-i mezkûrdan nısf hisse-i mezkûremi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üvey vâlidem merkūmeye sekiz yüz guruş semen-i makbûza bey‘ ü temlîk ve teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl etmekle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik fî-mâ ba‘d gedik-i mezkûrda olan nısf hissemde benim alâka ve medhalim kalmamışdır dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 25 Şevvâl sene 1246 Şuhûdü’l-hâl: Küçük Karaman’da es-Seyyid Hasan, Kethüdâ el-Hâc Yusuf.