İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 87 Hüküm no: 45 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Todori’nin uhdesindeki gedik hisselerini Vasil v. Kiryako’ya sattığı Bakkāl Medîne-i Kayseriye sancağında İncesu kasabasında mütemekkin Bakkāl Vasil v. Kiryako v. Atam nâm zimmî tarafından husûs-ı âti’l-beyânda vekîl olduğu Bakkāl Nikola v. İstefan ve Bakkāl İstavri v. Apostol nâm zimmîler şehâdetleriyle ber-nehc-i şer‘î sâbit ve sübût-ı vekâletine hükm-i şer‘î lâhık olan Bakkāl İstira[ti] v. Todori nâm zimmî meclis-i şer‘-i hatîrde müvekkil-i mersûmun sulbî kebîr oğlu işbu bâ‘isü’s-sifr Bakkāl Kiryako nâm zimmî muvâcehesinde bi’l-vekâle ikrâr-ı tâm ve takrîr-i kelâm edip Langa Yenikapısı kurbünde Zindandelen Hamamı karşısında kâin Ahmed Ağa Dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Bakkāl İspir[o] zimmînin ve mâ‘adâ altmış sehmi dahi akd-i âti’z-zikrin sudûruna değin müvekkilim mersûmun bâ-hüccet-i şer‘iye yedlerinde mülkleri olmağla gedik-i mezkûrdan müvekkilim mersûmun ber-minvâl-i muharrer mâlik olduğu altmış sehm hissesini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müştereki izniyle oğlu mersûm Kiryako zimmîye yedi bin guruşa bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr yedi bin guruşu tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ-i âmm-ı sahîh-i şer‘î ile ibrâ ve iskāt eyledik fî-mâ ba‘d gedik-i mezkûrun hisse-i mezkûresinde müvekkilim mersûm Vasil zimmînin aslâ ve kat‘â alâka ve medhali kalmayıp müşteri-i mersûm Kiryako zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 21 Şevvâl sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Yazıcı Filibos, Kabzımâl Dimitri, Ustabaşı İsak, Ustabaşı Ananosti, Bakkāl Dimitri.