İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 88 Hüküm no: 46 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görevinden azledilen Ahmed Ağa’nın yerine Mehmed Raşid Ağa’nın sabuncu esnafının kethüdalığına tayin olunduğu Kethüdâ nasbı Âsitâne-i aliyye’de vâki‘ sabuncu esnâfının kethüdâları olan el-Hâc Ahmed Ağa kethüdâlık-ı mezkûrdan bu def‘a azlolduğuna binâen esnâf-ı merkūmenin mu‘temed ve muhtârları idiği sâbık hancılar kethüdâsı zeyl-i vesîkada muharrerü’l-esâmî Müslimînin ihbâr ve iltimâslarıyla ve hâlâ Muhtesib-i İstanbul hâcegân-ı Dîvân-ı hümâyûn’dan Mehmed Emin Faik Efendi’nin re’y-i munzam idiği tarafından mersûl Çukadârı İbrahim Ağa’nın inhâsıyla zâhir olan işbu bâ‘isü’l-kitâb Mehmed Raşid Ağa b. Ahmed nâm kimesneyi hâkim-i muvakki‘-i sadr-ı kitâb -tûbâ lehû ve hüsnü-meâb- efendi hazretleri dahi esnâf-ı merkūme üzerine kethüdâ nasb u ta‘yîn ve esnâf-ı merkūmeden bir ferde hilâf-ı şer‘-i şerîf ve mugāyir-i kānûn-ı münîf rencîde ve ta‘addî etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā sebt ü imlâ olundu. Fî 29 L sene 1246 Şuhûdü’l-hâl: es-Seyyid Ali Ağa b. Ömer, es-Seyyid Ali Ağa b. es-Seyyid Ali, el-Hâc Ahmed Ağa b. Abdullah, es-Seyyid Hasan b. es-Seyyid Hüseyin, es-Seyyid Mehmed Şakir b. es-Seyyid el-Hâc Halil ve gayruhum.