İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 89 Hüküm no: 48 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zamba v. Yanako ile kardeşine ölen annelerinden miras kalan limoncu gediğinin oğullarına intikalinin tescili İhbâr-ı limoncu İhrâc-şüd Fî 8 M sene [12]60 Vilâyet-i Anadolu’da Nevşehir kasabasında Aşağımahalle mütemekkinelerinden olup bundan akdem hâlike olan Çeçika bt. Eftim Nasrâniyenin sadrî kebîr oğulları ve hasran vârisleri olduğu bi’l-ihbâr mütehakkık olan Zamba v. Yanako ve Yanko v. Kiryako nâm zimmîler meclis-i şer‘-i hatîrde takrîr-i kelâm ve ta‘bîr ani’l-merâm edip İstanbul’da Zindan Kapısı hâricinde nohutçular içinde kâin bir tarafı peynirci dükkânı ve bir tarafı limoncu dükkânı ile mahdûd bir bâb limoncu dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Nekodoki ve Nikoli nâm zimmîlerin ve mâ‘adâ altmış sehmi anamız ve mûrisemiz hâlike-i mersûme Çeçika Nasrâniyenin hayatında yedinde [9a] mülkü olup ba‘de helâkihâ otuz sehm nısfiyet üzere bize mevrûs olup lâkin yedimizde hüccetimiz olmamağla husûs-ı mezkûr erbâbından istihbâr olunup kıbel-i şer‘den yedimize bir kıt‘a hüccet i‘tâ olunmak bi’l-verâse murâdımızdır dediklerinde husûs-ı mezkûr mukırrân-ı mersûmân Zamba ve Yanko zimmîlerin takrîri üzere olup mârru’z-zikr altmış sehm hisse-i gediğin otuz sehmi mersûmân Zamba ve Yanko zimmîlerin mülk-i mevrûsları olduğunu zeyl-i vesîkada mektûbü’l-esâmî kimesneler alâ-tarîkı’ş-şehâde ihbâr etmeleriyle hıfzan-li’l-makāl işbu vesîka-i enîka bi’t-taleb keb ü imlâ olundu. Fî 27 Şevvâl sene 1246 Şuhûdü’l-hâl: Bölükbaşı İbrahim Edhem Ağa, Hafız İsmail Ağa b. Mustafa, Molla Hüseyin b. Molla Yusuf ve gayruhum. Ustabaşı Togodoş, Ustabaşı Yorgi, Sabuncu Sava.