İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 90 Hüküm no: 49 Orijinal metin no: [9a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Yazıcı ve ortaklarının uhdelerinde bulunan manav gediği hisselerini Mustafa Tahir Efendi ile Kosti’ye sattıkları Manav gediği mübâya‘ası Zikri âtî bir bâb manav gediği âlâtının yüz yirmi sehm i‘tibârıyla altmış sehmine mâlik olan Halil Yazıcı ve otuz sehmine mâlik olan Ömer yazıcı ve diğer otuz sehmine mâlik olan İbrahim Ağa evlâdı Hasan meclis-i şer‘-i şerîf-i enverde Gümrük-i kebîr ketebesinden işbu bâ‘iseyü’l-vesîka es-Seyyid Mustafa Tahir Efendi b. es-Seyyid Mehmed Ârif ile Manav Kosdi v. Dimitri nâm zimmî mahzarlarında her biri ikrâr-ı tâm ve takrîr-i kelâm edip mahmiye-i İstanbul hısnı ebvâbından Bahçekapısı hâricinde Eminönü nâm mahâlde deryâ üzerinde kâin bir tarafdan Topaç zimmî mağazası ve bir tarafdan Meyve-i ter Gümrüğü ile mahdûd şehriye on iki guruş kirâ-i kadîmeli bir bâb manav dükkânı derûnunda mevcûde beyne’l-esnâf gedik ta‘bîr olunur bir kantar ve bir terâzî ma‘a derâhim ve bir çekmece ve bir akçe tahtası ve sâir âlât-ı lâzıme-i ma‘lûme akd-i âti’z-zikrin sudûruna değin bizim bâ-hüccet-i şer‘iye bâlâda bast u beyân kılındığı üzere yedimizde mülkümüz olmağla biz ber-minvâl-i muharrer mâlikler olduğumuz hisselerimizi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid Mustafa Tahir Efendi ile mersûm Kosti zimmîye ale’l-iştirâk üç bin guruşa bey‘ ü temlîk ve her birimiz teslîm eylediğimizde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl edip semen-i mezkûr üç bin guruşu bize tamâmen def‘ ü teslîm ve biz dahi yedlerinden ahz u kabz ve beynimizde iktisâm etmemizle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm âlât-ı muharrere-i mezkûrede bizim aslâ ve kat‘â alâka ve medhalimiz kalmayıp müşteriyân-ı merkūmân es-Seyyid Mehmed Tahir Efendi ve Kosti zimmînin mülk-i müşterâları ve hakk-ı sırfları olmuşdur dediklerinde gıbbe’t-tasâduk[i’ş-şer‘î mâ vaka‘a bi’t-taleb ketb olundu] Fî 26 Şevvâl sene [1246] Şuhûdü’l-hâl: Bölükbaşı Edhem Ağa, el-Hâc Yunuszâde Mehmed Ağa, Ahmed Yazıcı, es-Seyyid Mahmud Yazıcı, Kantarcı Abbas.