İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 91 Hüküm no: 50 Orijinal metin no: [9a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacak tahsili için vekil tayini Kabûlüne mevkūfe vekâlet Mahrûse-i Galata’ya muzâfe İstinye nâhiyesine tâbi‘ Hümâyûnâbad nâm-ı diğer Bebek karyesinde mütemekkin Sofcular Han’ı sarrâflarından Tıngıroğlu yeğeni Hoca Kigork v. Çertimyos v. Bedros nâm zimmî meclis-i şer‘-i şerîf-i enverde takrîr-i kelâm ve bast ani’l-merâm edip benim vilâyet-i Anadolu’da Hüdâvendigâr sancağında Gāzî? Mihalıçcık kazâsı kurâlarından Dinek karyesinde sâkin iken bundan akdem vefât eden kazâ-i mezbûr voyvodası esbak Muradağazâde el-Hâc İbrahim Ağa zimmetinde işbu yedimde olup bin iki yüz kırk iki senesi Cemâziyelevveli’nin yirmi beşinci günü târîhiyle müverrah mümzâ ve mahtûm bir kıt‘a tahvîl mantûkunca cihet-i karzdan alacak hakkım olan on sekiz bin guruşun beş bin guruşunu işbu sene-i mübâreke Recebi’l-ferdi gurresinde kazâ-i mezbûr nâibi es-Seyyid Veliyyüddin Vehbi Efendi’nin bir kıt‘a i‘lâmı ve beş bin guruşunu dahi sene-i mezbûre Ramazanı’nda zahr-ı temessük mantûkunca iki def‘ada on bin guruşunu ahz u kabz etmemle bâkīsi olan sekiz bin guruş alacak hakkımı kable’l-ahz ve’l-istîfâ mezbûr el-Hâc İbrahim Ağa fevt olmağla meblağ-ı bâkī-i mezkûr sekiz bin guruşu müteveffâ-yı mezbûrun terekesine vâzı‘ü’l-yed olanlardan mahâllinde taleb ve da‘vâ ve ahz u kabza ve makbûzunu bana irsâl ve îsâle ve husûs-ı mezkûr mütevakkıf olduğu umûrun küllîsine tarafımdan kazâ-i mezbûra tâbi‘ Koyunağılı nâm karyede sâkin sâbık kazâ-i merkūm voyvodası bâ‘isü’l-kitâb el-Hâc Mehmed Ağa’yı kabûlüne mevkūfe vekîl ve nâib-i menâb nasb u ta‘yîn eyledim deyü îfâ-i merâm etmeğin mâ vaka‘a [bi’t-taleb ketb olundu] Fî-gurreti Za sene 1246 Şuhûdü’l-hâl: Muhzır Salih Ağa b. Mehmed, Çukadâr Hasan Ağa tâbi‘-i hazret-i Sadr-ı Anadolu.