İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 91 Hüküm no: 51 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havyarcı İstavri’nin sahibi olduğu mallarının satılarak borçlarının ödenmesi Guremâ defteri İhrâc-şüd Fî 17 Ra sene [1]253 Hurrire, es-Seyyid Abdurrahim el-kādı bi-Dârü’l-hilâfeti’l-aliyye nemekahü’l-fakīr ileyhi azze şânühû gufira leh. Âsitâne-i aliyye’de Balıkpazarı hâricinde vâki‘ havyarcı esnâfından İstavri v. Hıristo zimmînin zeylde isimleri mastûr kimesnelere bâ-i‘lâm-ı şer‘î mahkûmün-bih on bin dokuz yüz seksen dört guruş deyni olmağla zimmî-i mesfûrun mahâll-i mezkûrda kâin bir bâb havyarcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden yüz yirmi sehm i‘tibârıyla mâlik olduğu on bir sehm hissesi bi’l-müzâyede âhara bey‘ ve kabz olunan semeninden hisse-i mezkûre mukābelesinde rehin olduğu zimmî-i mersûmun deyni ve mesârifi fürû-nihâde ve ihrâc olundukdan sonra bâkī kalan bin sekiz yüz guruşdan mâ‘adâ mersûm İstavri zimmînin üzerinde lâbis olduğu köhne libâsından gayrı ismi mâl ıtlâk olunur mâlı olmadığı mütehakkık olduğuna binâen meblağ-ı bâkī-i mezkûr ashâb-ı düyûnundan iltimâs edenleri taleb ve ma‘rifetleriyle alâ-vechi’l-guremâ tevzî‘ ve taksîm olunduğu keyfiyetidir ki ber-vech-i âtî zikr ü beyân olunur. Fi’l-yevmi’s-sâbi‘ ve’l-ışrîn min-Şevvâli’l-mükerrem li-sene sitte ve erba‘în ve mi’eteyn ve elf. Nikita zimmî Asl-ı mâl 750 guruş Mine’l-garâme 122 guruş, 36 para Abacı Pandeli zimmî Asl-ı mâl 1375 guruş Mine’l-garâme 225 guruş, 12 para, 2 akçe Bakkāl Dimitri zimmî Asl-ı mâl 250 guruş Mine’l-garâme 40 guruş, 38 para, 2 akçe Havyarcı Kosti zimmî Asl-ı mâl 500 guruş Mine’l-garâme 81 guruş, 37 para, 1 akçe Bakkāl Kostandi zimmî Asl-ı mâl 300 guruş Mine’l-garâme 49 guruş, 6 para, 1 akçe İngiltereli Covanni Asl-ı mâl 150 guruş, Mine’l-garâme 24 guruş, 23 para Dellâl Mihal zimmî Asl-ı mâl 3784 guruş Mine’l-garâme 620 guruş, 2 para, 2 akçe Diğer Bakkāl Dimitri zimmî Asl-ı mâl 500 guruş Mine’l-garâme 81 guruş, 37 para, 1 akçe Başka Bakkāl Dimitri zimmî Asl-ı mâl 250 guruş, Mine’l-garâme 40 guruş, 39 para Pola Yahûdiye Asl-ı mâl 625 guruş Mine’l-garâme 102 guruş, 16 para, 2 akçe Sultane Yahûdiye Asl-ı mâl 1500 guruş Mine’l-garâme 245 guruş, 32 para Eleniko Nasrâniye Asl-ı mâl 1000 guruş Mine’l-garâme 163 guruş, 34 para, 2 akçe Kesr: 11 akçe Ser-nâmede ismi mastûr medyûn İstavri zimmînin bâlâda isimleri mastûr dâyinlerinden Dellâl Mihal zimmînin hissesine iktizâ eden altı yüz yirmi guruş iki para iki akçe ve Havyarcı Kostandi zimmînin hissesi olan seksen bir guruş otuz yedi para bir akçe ve Bakkāl Dimitri zimmînin hissesine îcâb eden kırık guruş otuz sekiz para iki akçe ve Nikita zimmînin hissesi olan yüz yirmi iki guruş otuz altı para ve İngiltereli Covanni’nin hissesine iktizâ eden yirmi dört guruş yirmi üç para ve Eleniko Nasrâniyenin hissesi olan yüz altmış üç guruş otuz dört para iki akçe ki cem‘an mesfûrûna alâ-vechi’l-garâme def‘ ü teslîmi iktizâ eden bin elli dört guruş on para yedi akçe medyûn-ı mersûmun hilâl-i sutûr-ı ser-nâme-i defterde zikr olunduğu üzere mâl-ı mevcûdu olan bin sekiz yüz guruşdan fürû-nihâde ve tenzîl olundukdan sonra bâkī kalan yedi yüz kırk beş guruş yirmi yedi para iki akçe sâir dâyinler için Bezzâzistan[d]a hıfz olunmak üzere karar verildiği işbu mahalle şerh verildi.