İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 93 Hüküm no: 52 Orijinal metin no: [9b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karyana bt. Atam’ın gedik hisselerini Tütüncü Kirkor’a sattığı Tütüncü Mahmiye-i İstanbul’da Samatya kurbünde Mirahur mahallesinde mütemekkine Karyana bt. Atam nâm Nasrâniyenin sadrî kebîr oğlu ve tarafından husûs-ı âti’l-beyânda ikrâr ve takrîre vekîl olduğu şahsını ârifân Hasan Ağa b. İbrahim ile Tütüncü Aci Ohannes v. Mıgırdıç nâm zimmî şehâdetleriyle sâbit olan Keseci Manol v. Ohannes nâm zimmî meclis-i şer‘-i hatîrde işbu hâmilü’r-rakīm Tütüncü Kirkor v. Anderyas nâm zimmî muvâcehesinde bi’l-vekâle ikrâr-ı tâm ve takrîr-i kelâm edip anam ve müvekkilem mersûme mahmiye-i mezbûrede Sulumanastır civârında Çilingir Câmi‘i altında kâin beher şehr yüz para kirâ-i kadîmeli bir bâb tütüncü dükkânı derûnunda mevcûde Ma‘den Kalemi’nde karındaşım hâlik Tütüncü Kirkor zimmî ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin karındaşım hâlik-i mersûm Kirkor zimmîden mevrûs yedimde müstakılleten mülküm olmağla ben ber-minvâl-i muharrer mâlike olduğum gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Kirkor zimmîye bin dokuz yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin dokuz yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Kirkor zimmînin mülk-i müşterâsı ve hakk-ı sırfı olmuşdur dedi dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 29 Şevvâl sene 1246 Şuhûdü’l-hâl: Kethüdâ Mustafa Kâşif Ağa, Vekîli Mehmed Ağa, Yazıcı Mehmed Efendi, Yiğitbaşı Hafız Ahmed Ağa, Köşe Ustası Hasan Ağa.