İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 93 Hüküm no: 53 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın uhdesindeki menzil hissesini Münire Hanım’a sattığı Muhtesib Karagöz mahallesinde mülk menzil Hâlâ Devlet-i aliyye-i ebediyyü’l-istimrârda Tophâne-i âmire Nâzırı sa‘âdetlü, semâhatlü atûfetlü es-Seyyid Mehmed Hâdî Efendi hazretleriyle halîle-i muhteremeleri fahrü’l-muhadderât ismetlü Münire Hanım’a zikri âtî mülk menzilden hissesini bey‘ murâd eden es-Seyyid Abdurrahman Ârif Efendi b. es-Seyyid Mehmed Ağa meclis-i şer‘-i şerîf-i enverde işbu kitâb-ı sıhhat-nisâbın vusûl-i eyâdî-i kerîmeleriyle şeref-yâb olan müşârün-ileyhimâ es-Seyyid Mehmed Hâdî Efendi b. es-Seyyid Hafız Emrullah Efendi ve Münire Hanım bt. Derviş Mustafa Bey kıbellerinden husûs-ı meymenet-mahsûs-ı câ’i’z-zikrde tasdîka vekîl-i şer‘îleri Kethüdâ-i âlî-kadr Mehmed Nazif Efendi b. Mustafa mahzarında ikrâr-ı tâm ve takrîr-i kelâm edip İstanbul’da Muhtesib Karagöz mahallesinde vâki‘ bir tarafdan müvekkilân-ı müşârün-ileyhimânın bi’l-iştirâk uhdelerinde olan sa‘âdethâneleri ve bir tarafdan yine ba‘zen sa‘âdethâne-i mezkûr ile Dârü’l-hadîs medresesi ve bir tarafdan zenciye Mesude Hatun menzili ve bir tarafdan tarîk-i âm ile mahdûd tahmînen bin altı yüz elli dört zirâ‘ arsa üzerine mebnî fevkānî ve tahtânî üç bâb oda ve üç bi’r-i mâ ve eşcâr-ı müsmire ve gayr-ı müsmireli bahçe ve müştemilât-ı sâire-i ma‘lûmeyi muhtevî bir bâb mülk menzilin üç hisse i‘tibârıyla iki hissesi müvekkilân-ı müşârün-ileyhimânın iştirâken uhde-i devletlerinde ve bir hissesi dahi akd-i âti’z-zikrin sudûruna değin benim yedimde mülküm olmağın ben mâlik olduğum hisse-i mezkûremi tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î <> ile müvekkilân-ı müşârün-ileyhimâ hazretlerine ale’l-iştirâki’s-seviyy iki bin beş yüz guruşa bey‘ ü temlîk ve vech-i lâyıkı üzere teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr iki bin beş yüz guruşu bana tamâmen def‘ ü teslîm buyurduklarından sonra akd-i mezkûrun tağrîr ve gabnine müte‘allika âmme-i <> de‘âvî ve kâffe-i mutâlebâtdan müvekkilân-ı müşârün-ileyhimâ hazretlerinin zimmetlerini ibrâ-i âmm-ı sahîh-i şer‘î ve iskāt-ı tamm-ı sarîh-i mer‘î ile kabûllerini hâvî ibrâ ve iskāt eyledim fî-mâ ba‘d menzil-i mezkûrun bir sehm hisse-i mezkûresinde benim aslâ ve kat‘â alâka ve medhalim kalmayıp müvekkilân-ı müşârün-ileyhimâ hazretlerinin iştirâken mülk-i müşterâları olmuşdur irâdeleri vechile bi’s-sıhhati-ve’l-afiye temellük ve tasarruf buyursunlar dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 2 Zilka‘deti’ş-şerîfe sene 1246 Şuhûdü’l-hâl: es-Seyyid Hafız Hüseyin Ağa b. Şerif Abdullah, es-Seyyid Ali Ağa b. es-Seyyid Mehmed Emin, Ahmed Ağa b. Süleyman, Mahmud Çelebi el-Muhzır, Kethüdâ-i muhzırân Hafız İsmail Ağa.