İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 97 Hüküm no: 57 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola ve Dimo zimmilere babalarından miras kalan değirmen taşı dişleyici gedik hisselerini Vasil v. Mişo’ya sattıkları Değirmen taşı dişleyici gediği Âsitâne-i aliyye ve tevâbi‘i olan Galata ve Üsküdar ve Eyyûb-i Ensârî ve nevâhîlerinden kasabât ve kurâda vâki‘ ekmekçi ve uncu değirmenleri taşlarını dişleyip ve horoslarını mahallerine vaz‘ ve çarhlarını i‘mâl eden tâifeden döşemeci esnâfı ta‘bîr olunur bâ-fermân-ı âlî on dokuz nefer ustalarından olup bundan akdem hâlik olan Kapan-ı dakīkli İstirati v. Drağman nâm zimmînin sulbî kebîr oğulları ve hasran vârisleri olan Nikola ve Dimo nâm zimmîler meclis-i şer‘-i münîrde esnâf-ı mezkûre kalfalarından işbu bâ‘isü’l-vesîka Vasil v. Mişo nâm zimmî muvâcehesinde her biri bi’l-verâse ikrâr-ı tâm ve takrîr-i kelâm edip Âsitâne-i aliyye ve tevâbi‘i olan Bilâd-ı selâse-i mezkûre ve muzâfâtlarında kâin değirmenlerin lede’l-iktizâ taşlarını dişleyip ve çarhlarını i‘mâlle me’lûf döşemeci esnâfına mahsûs ve mevkūf olup esnâf-ı mezkûre beynlerinde gedik ta‘bîr olunan âlât-ı lâzıme-i ma‘lûmenin mâliki olan babamız mesfûr İstirati zimmî bundan akdem hâlik oldukda gedik-i mezkûr nısfiyet üzere hasran bize mevrûs ve akd-i âti’z-zikrin sudûruna değin yedimizde ırsen mülkümüz olmağla biz âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Vasil zimmîye dört bin yüz guruşa bey‘ ü temlîk ve teslîm eylediğimiz[de] ol dahi ber-minvâl-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezkûr dört bin yüz guruşu bize tamâmen def‘ ü teslîm ve biz dahi yedinden bi’t-tamâm ve’l-kemâl ahz u kabz ve bi-kadri’l-hısas beynimizde iktisâm eylediğimizden sonra bey‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i meşrûh âharın ibrâsını kabûl eyledik fî-mâ ba‘d gedik-i mezkûrda bizim aslâ ve kat‘â alâka ve medhalimiz kalmayıp müşteri-i mersûm Vasil zimmînin emvâl-i müşterâtı ve hakk-ı sırfı olmuşdur esnâf-ı mezkûrenin şurût ve nizâmı <<üzere>> mûcebince dilediği gibi mâlik ve mutasarrıf olsun dediklerinde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 4 Zilka‘deti’ş-şerîfe sene 1246 Şuhûdü’l-hâl: Hafız İsmail Ağa b. Mustafa, Hüseyin Çelebi b. Yusuf ve gayruhum. Kâhya Kostandi v. Paço, Eyüblü Usta Kaymal, Galatalı Yorgaki, Unkapanlı Yorgaki, Altımermerli Kosta, Kumkapılı Tanaş.