İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 98 Hüküm no: 58 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap Yani’nin uhdesindeki değirmen taşı dişleyici gediğini Temyo v. Yamandi’ye sattığı Değirmen taşı dişleyici gediği Âsitâne-i aliyye ve tevâbi‘i olan Galata ve Üsküdar ve Eyyûb-i Ensârî ve nevâhîlerinden kasabât ve kurâda vâki‘ ekmekçi ve uncu değirmenleri taşlarını dişleyip ve horoslarını mahallerine vaz‘ ve çarhlarını i‘mâl eden tâifeden döşemeci esnâfı ta‘bîr olunur bâ-fermân-ı âlî on dokuz nefer ustalarından olup bundan akdem hâlik olan Kapan-ı dakīkli Kosta v. Yani nâm zimmînin sulbî kebîr oğlu ve hasran vârisi Kasab Yani nâm zimmî meclis-i şer‘-i münîrde <> esnâf-ı mezkûre kalfalarından işbu bâ‘isü’l-vesîka Temyo v. Yamandi nâm zimmî muvâcehesinde bi’l-verâse ikrâr-ı tâm ve takrîr-i kelâm edip Âsitâne-i aliyye ve tevâbi‘i olan Bilâd-ı selâse-i mezkûre ve muzâfâtlarında kâin değirmenlerin lede’l-iktizâ taşlarını dişleyip ve çarhlarını i‘mâl ile me’lûf ve döşemeci esnâfı[na] mahsûs ve mevkūf olup esnâf-ı mezkûre beynlerinde gedik ta‘bîr olunan âlât-ı lâzıme-i ma‘lûmenin mâliki olan babam mersûm Kosta zimmî bundan akdem hâlik oldukda gedik-i mezkûr hasran bana mevrûs ve akd-i âti’z-zikrin sudûruna değin yedimde ırsen mülküm olmağla ben âlât-ı gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Temyo zimmîye dört bin yüz guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezkûr dört bin yüz guruşu bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i mersûm Temyo zimmînin mülk-i müşterâsı ve hakk-ı sırfı olmuşdur esnâf-ı mezkûrenin şurût ve nizâmı mûcebince dilediği gibi mâlik ve mutasarrıf olsun dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 4 Za sene 1246 Şuhûdü’l-hâl: Eş-şâhidûnü’s-sâbikūn