İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 99 Hüküm no: 59 Orijinal metin no: [11a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın uhdesindeki gedik hisselerinden bir kısmını Hasan Ağa’ya sattığı Kebabçı ve hoşâbçı Âsitâne-i seniyye’de vâki‘ kebapçı esnâfından es-Seyyid Ahmed Ağa b. es-Seyyid Mehmed nâm kimesne meclis-i şer‘-i münîrde gözlemeci esnâfından işbu bâ‘isü’l-kitâb Hasan Ağa b. İbrahim mahzarında ikrâr-ı tâm ve takrîr-i kelâm edip mahmiye-i mezbûrede Vezneciler sûkunda vâki‘ ütücü ve helvacı dükkânları beynlerinde kâin bir bâb kebapçı ve hoşâbcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakıllen mülküm olmağla ben ber-minvâl-i muharrer mâlik olduğum gedik-i mezkûrun nısf hissesini yedimde ibkā ve nısf-ı âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Hasan Ağa’ya iki bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr [11b] iki bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i [mezkûrun] tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik ba‘de’l-yevm nısf-ı gedik-i mezkûrda benim aslâ ve kat‘â alâka ve medhalim kalmayıp müşteri-i merkūm Hasan Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şevvâl sene 1246 Şuhûdü’l-hâl: Kethüdâ Ali Ağa, Mütevellî Mehmed Ağa, Yiğitbaşı Seyid Mehmed Ağa, Yazıcı Sipâhî Mehmed Efendi, Odacı Hüseyin Çelebi.