İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 100 Hüküm no: 60 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marko ve Nikola’nın, Tarifon’un Ahmed Efendi’ye olan borçlarına kefil oldukları Rehn-i gedik-i aşçı Âsitâne-i seniyye’de vâki‘ aşçı ve hoşâbçı ve çörenci ve bozacı esnâfından Tarifon v. Mitro nâm zimmî meclis-i şer‘-i hatîrde Bezzâzistân-ı atîk münâdîlerinden işbu bâ‘isü’l-kitâb Ahmed Efendi b. Mustafa mahzarında ikrâr-ı tâm ve takrîr-i kelâm edip merkūm Ahmed Efendi’nin işbu târîh-i kitâb günü mâlından iktirâz edeceğim üç bin iki yüz guruş mukābelesinde mahmiye-i mezbûre hısnı ebvâbından Kumkapı hâricinde helvacı dükkânı ittisâlinde kâin bir bâb aşçı ve hoşâbçı ve bozacı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla bâ-hüccet-i şer‘iye mâlik olduğum altmış sehm hissemi rehin vaz‘ ve merkūm Ahmed Efendi yedine teslîm eylediğimde ol dahi ber-minvâl-i muharrer irtihân ve kabz ve kabûl eylediğinden sonra hisse-i mezkûreyi merkūm Ahmed Efendi li-ecli’l-isti‘mâl bana i‘âre ve teslîm ve ben dahi isti‘âre ve kabz eylediğimden sonra merkūm Ahmed Efendi bana mâlından üç bin iki yüz guruş ikrâz ve teslîm ve ben dahi yedinden iktirâz ve kabz ve umûruma sarfla istihlâk etmemle meblağ-ı mezkûr ile semeni târîh-i mezkûrdan iki sene tamâmına değin müeccel mev‘ûd yine merkūm Ahmed Efendi’nin mâlından ve yedinden iştirâ ve kabz eylediğim bir aded hilâlî sâ‘at semeninden dahi dokuz [yüz] altmış guruş ki cem‘an dört bin yüz altmış guruş merkūm Ahmed Efendi’ye zimmetimde sahîhan edâsı vâcib deynimdir dedikde gıbbe’t-tasdîki’ş-şer‘î esnâf-ı mersûmeden Marko ve Nikola veledey Tanaş zimmîlerden her biri meclis-i şer‘-i hatîrde merkūm Ahmed Efendi mahzarında ikrâr-ı tâm ve takrîr-i kelâm edip mukırr-ı mersûm Tarifon zimmînin merkūm Ahmed Efendi’ye zimmetinde deyni olan meblağ-ı mecmû‘-ı mezkûr dört bin yüz altmış guruşa biz tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile müte‘âkiben kefîl ve dâminleriz dediklerinde gıbbe’t-tasdîki’ş-şer‘î mâ vaka‘a bi’t-taleb [ketb olundu] Fî 24 Şevvâl sene 1246 Şuhûdü’l-hâl: Eş-şâhidûnü’s-sâbikūn Nikola v. Kostandi, Kosta v. Hıristo.