İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 100 Hüküm no: 61 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avakim v. Markar’ın uhdesindeki gedik hisselerini Tarifon zimmîye sattığı Kumkapı’da aşçı Âsitâne-i seniyye’de vâki‘ aşçı ve hoşâbçı ve çörenci ve bozacı esnâfından Avakim v. Markar nâm zimmî meclis-i şer‘-i hatîrde esnâf-ı mersûmeden işbu hâmilü’r-rakīm Tarifon v. Mitro nâm zimmî muvâcehesinde Bezzâzistân-ı atîk münâdîlerinden Ahmed Efendi b. Mustafa hâzır olduğu hâlde ikrâr-ı tâm ve takrîr-i kelâm edip mahmiye-i mezbûre hısnı ebvâbından Kumkapı hâricinde helvacı dükkânı ittisâlinde kâin bir bâb aşçı ve hoşâbçı ve çörenci ve bozacı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi işbu hâzır bi’l-meclis Marko v. Tanaş zimmînin ve diğer altmış sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olup lâkin ben altmış sehm hissemi hâzır-ı merkūm Ahmed Efendi’ye iki bin sekiz yüz guruş deynim mukābelesinde rehin etmiş idim el-hâletü hâzihî hisse-i mezkûremi rehniyetden ba‘de’l-fekk ve’t-tahlîs tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim hâzır-ı mersûmun izniyle mersûm Tarifon zimmîye beş bin beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr beş bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrun hisse-i şâyi‘asında benim aslâ ve kat‘â alâka ve medhalim kalmayıp müşteri-i mersûm Tarifon zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 23 L sene 1246 Şuhûdü’l-hâl: Eş-şâhidûnü’s-sâbikūn