İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 101 Hüküm no: 62 Orijinal metin no: [12a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortadan kaybolan Dimitri zimmînin odasının açılarak eşyalarının satıldığı, Kayyım Hüseyin Ağa’nın kendisine teslim edilen paraları harcaması üzerine borçlandığı miktar için kefile bağlandığı Defter-i mefkūd Sâbıkā sadr-ı vâlâ-yı Anadolu devletlü inâyetlü atûfetlü el-Hâc Mehmed Hamdullah Efendi necli’l-merhûmü’l-mebrûr Şeyhülislâm-ı esbak Mehmed Ârif Efendi hazretlerinin mahdûm-ı mükerremleri müderrisîn-i kirâm-ı zevi’l-ihtirâmdan el-Hâc Mehmed Âmir Efendi ve müşârün-ileyh efendi hazretlerinin enişteleri mevâlî-i i‘zâmdan sâbıkā İzmir kādısı Kara Halil Efendi hafîdi fazîletlü Ahmed Necib Efendi ile iffetlü Râbia Hanım ve Zekiye Hanım ve nakībü’l-eşrâf-ı esbak merhûm Sıddık Efendi’nin halîlesi Fâtıma hanımefendilerinin bâ-temessük-i mütevellî bi’l-icâreteyn iştirâken ve şâyi‘an mutasarrıflar oldukları İstanbul’da Odunkapısı dâhilinde vâki‘ Kutucular Han’ı denmekle arîf bir bâb hanın tabaka-i ulyâsında nihâyetde memşâlar ittisâlinde kâin bir bâb oda ve derûnunda bi’l-müşâhere müsteciren mütemekkin Tütüncübakkāl karyeli Dimitri zimmî oda-i mezkûreyi bundan akdem mukaffelen terk ve ta‘tîl birle diyâr-ı âhara firâr ve gaybet-i munkatı‘a ile gāib ve mefkūd olmağla oda-i mezkûrenin kuflü ma‘rifet-i şer‘le feth ü küşâd ve derûnunda mevcûd mütesâri‘ü’l-fesâd olan eşyâsı tahrîr ve semen-i misilleriyle âhara bey‘ olunup esmânı gāib-i mersûmun hâli mütebeyyin oluncaya değin yed-i emîne vaz‘ ve oda-i mezkûre kendilere teslîm olunmasını han-ı mezkûrun mutasarrıfları müşârün-ileyhim iltimâs etmeleriyle savb-ı şer‘-i enverden mezûnen irsâl olunan Kâtib es-Seyyid Ahmed Rıza Efendi ma‘an meb‘ûs ümenâ-i şer‘den Çukadâr Abdurrahman Ağa b. Mehmed ve Muhzır Molla Halil b. Süleyman ile oda-i mezkûreye varıp müşârün-ileyhim taraflarından vekîl-i şer‘îleri es-Seyyid Hafız Salih Hakkı Efendi b. es-Seyyid Mehmed ile tütüncü esnâfının kethüdâsı Mustafa Kâşif Ağa ve vekîli Ünyeli es-Seyyid Mehmed Ağa ve Yiğitbaşısı Hafız Ahmed Ağa b. Halil ve gāib-i mersûmun dâyinlerinden Tütüncü Hüseyin Ağa b. Eyüb nâm kimesneler ile Tütüncü Londari v. Yani ve han-ı mezkûrun Hancısı İspir[o] v. Sefer nâm zimmîler hâzır oldukları hâlde oda-i mezkûrenin kuflü ma‘rifet-i şer‘le feth ü küşâd ve gāib-i zimmî-i mesfûrun oda-i merkūme derûnunda mütesâri‘ü’l-fesâd olan eşyâsı tahrîr ve semen-i misilleriyle âhara bey‘ olunup esmânı gāib-i mersûmun hâli mütebeyyin oluncaya değin mu‘temed ve müstakīm olduğu bi’l-ihbâr zâhir olup kıbel-i şer‘den bi’l-kabûl kayyım nasb olunan mezbûr Hüseyin Ağa yedine teslîm olunan eşyânın defteridir ki ber-vech-i âtî zikr olunur. Fî-selhi Saferi’l-hayr li-sene sitte ve erba‘în ve mi’eteyn ve elf. Sagīr ve kebîr minder 1 aded Yastık 1 aded 30 guruş Yeşil tahta sandık 1 aded 13 guruş 10 para Köhne yorgan 3 aded Sagīr yastık 1 aded Erkân minderi köhne 1 aded 25 guruş Yün memlû köhne çatma yastık 10 aded 7 guruş Köhne minder kılıfı, 1 aded Hırdavat memlû köhne yastık 2 aded Şayak parçası köhne minder 1 aded Köhne yorgan 1 aded 4 guruş Köhne şalvar 1 aded Post kürk ma‘a hırdavat 1 aded 16 guruş Boğazhisar tabağı 16 aded Kandil 1 aded Fincan 1 aded Küc 1 aded Kadeh 1 aded İskemle ma‘a tabla 1 aded 4 guruş Köhne ceviz piştahta 1 aded İskemle 1 aded Keser 1 aded Bekmez testisi 1 aded Köhne fes 2 aded Kavanoz 1 aded Köhne sepet 2 aded Marpiç 2 aded 10 guruş 10 para Lenger 1 aded Musluklu su tenekesi 1 aded Nargile seri pirinç 2 aded Billûr kâse kapağı 3 aded Billûr kandil 1 aded Beyaz tabak 5 aded 6,5 guruş 10 para Sepetli kebîr şişe 1 aded, Fincan 2 aded, Billûr kâse 1 aded, Silme çubuk 1 aded 5 guruş Kömür bir mikdâr 1 guruş Cem‘an yekûn Guruş Yalnız yüz yirmi buçuk guruş on paradır 122,5 Dellâliye 2 120,5 Kalemiye ma‘a kaydiyye 3 Sahhu’l-bâkī 117,5 Sahhu’l-bâkī-i merkūm yüz on yedi buçuk guruş kayyım-ı merkūm Hüseyin Ağa yedine teslîm olundukda ol dahi tamâmen ahz u kabz ve meblağ-ı bâkī-i mezkûru kendi umûruna sarfla istihlâk edip zimmetinde gāib-i mersûma damânen deyni olduğunu tâyi‘an ve kat‘iyyen huzûr-ı şer‘de ikrâr u i‘tirâf eyledikden sonra Yiğitbaşı-i mezbûr Hafız Ahmed Ağa dahi merkūm Hüseyin Ağa’nın gāib-i mesfûra ber-vech-i muharrer zimmetinde damânen deyni olan meblağ-ı bâkī-i mezkûr yüz on yedi buçuk guruşa mezbûr Hüseyin Ağa’nın emriyle kefîl ve dâmin olduğunda tashîhan li’l-kefâle kıbel-i şer‘den vasî nasb olunan mezbûr Muhzır Molla Halil dahi kefâlet-i mezkûreyi kabûl eylediği işbu mahalle şerh verildi. es-Seyyid Abdurrahim el-kādı bi-Dârü’l-hilâfeti’l-aliyye el-fakīr ileyhi azze şânühû