İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 103 Hüküm no: 63 Orijinal metin no: [12b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kostandi’nin uhdesinde bulunan gedik hisselerinden bir kısmını kardeşine sattığı Bakkāl Âsitâne-i seniyye’de vâki‘ bakkāl tâifesinden Kostandi v. Togodoş nâm zimmî meclis-i şer‘-i hatîrde li-ebeveyn er karındaşı işbu bâ‘isü’r-rakīm Ligori nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Kiremit mahallesinde kâin Haraççıbaşı dükkânı denmekle şehîr bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin müstakıllen yedimde mülküm olmağla ben âlât-ı gedik-i mezkûrun nısfını yedimde ibkā ve nısf-ı âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile karındaşım mersûm Ligori zimmîye bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr bin guruşu karındaşım müşteri-i mesfûr Ligori zimmî yedinden tamâmen ve kâmilen ahz u kabz etmemle fî-mâ ba‘d âlât-ı gedik-i mezkûrun nısf hissesinde benim aslâ ve kat‘â alâka ve medhalim kalmayıp karındaşım müşteri-i mesfûrun mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 21 Ramazani’l-mübârek sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Ağa, Hüseyin b. Yusuf. Kabzımâl Dimitri, Yazıcı Filibos, Ustabaşı İsak, Ustabaşı Yani.