İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 104 Hüküm no: 64 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarsi bt. Tanaş’ın borcunu ödeyerek rehin bıraktığı gedik aletlerini geri aldığı Tuhafçı ibrâsı Mahrûse-i Galata’ya muzâfe kasaba-i Beşiktaş’da İmâmzâde sokağı nâm mahâlde mütemekkin tuhafçı tâifesinden Aleksi v. Panayot nâm zimmî meclis-i şer‘-i hatîrde işbu bâ‘isetü’l-vesîka şahsı mu‘arrefe Tarsi bt. Tanaş nâm Nasrâniye muvâcehesinde ikrâr-ı tâm ve takrîr-i kelâm edip mersûme Tarsi Nasrâniye bundan akdem mâlımdan ve yedimden iktirâz ve kabz ve umûruna sarfla istihlâk eylediği beş bin guruş deyni mukābelesinde bâ-hüccet-i şer‘iye yedinde mülkü olup mahmiye-i İstanbul’da Çarşı-yı kebîrde Kalpakçılarbaşı’nda vâki‘ Tuhafçı Dimitri ve Tuhafçı Aci Yorgi zimmîler dükkânları beynlerinde kâin bir bâb tuhafçı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmesini sûret-i bey‘de bana bâ-hüccet-i şer‘iye rehin vaz‘ u teslîm ve ben dahi irtihân ve kabz ve kabûl etmişidim el-hâletü hâzihî deyni olan meblağ-ı mezkûr beş bin guruşu mersûm Tarsi Nasrâniye bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle ol vechile gedik-i mezkûru rehniyetden fekk ü tahlîs edip bi’l-cümle husûs-ı mezkûra ve işbu târîh-i kitâba gelince beynimizde cereyân eden cemî‘ <> ahz ü i‘tâ ve mu‘âmelât-ı şettâ ve hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını kabûl eyledik dedikde mukırr-ı mersûm Aleksi zimmînin bi’l-cümle sâdır olan kelimât-ı meşrûhasını mersûme Tarsi Nasrâniye vicâhen tahkīk ve şifâhen tasdîk etmeğin mâ vaka‘a [bi’t-taleb ketb olundu] Fî 26 Şevvâl sene 1246 Şuhûdü’l-hâl: Kethüdâ-i muhzırân İsmail Ağa, Hüseyin Çelebi b. Yusuf, Ahmed Çelebi el-Muhzır. Keresteci Kiryako v. Kiryako, Kalpakçı Hıristo v. Manol, Fırancalacı İstefan, Tuhafçı Dimitri v. Kostandi, Kazzâz Yiğitbaşısı Petro v. Yuvan.