İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 105 Hüküm no: 65 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarsi bt. Baratacı Tanaş’ın uhdesindeki gedik hisselerini Kalfaoğlu Yakovaki’ye sattığı Tuhafçı gediği Mahrûse-i Galata hâricinde Beyoğlu nâm mahâlde Sandalcı sokağında mütemekkine ve şahsı zeyl-i hüccetde muharrerü’l-esâmî kimesneler ta‘rîfleriyle mu‘arrefe Tarsi bt. Baratacı Tanaş v. Yani nâm Nasrâniye meclis-i şer‘-i hatîrde tuhafçı esnâfından işbu hâmilü’r-rakīm Kalfaoğlu Yakovaki v. İsak nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul’da Çarşı-yı kebîr’de Kalpakçılarbaşı’nda vâki‘ Tuhafçı Dimitri ve Tuhafçı Aci Yorgi zimmîler dükkânları beynlerinde kâin bir bâb baratacı dükkânı derûnunda mevcûde Başmuhâsebe Kalemi’nde babam mersûm Tanaş zimmî ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakılleten mülküm olmağla ben ber-minvâl-i muharrer mâlike olduğum gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Yakovaki zimmîye on bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr on bin guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim [kalmayıp] müşteri-i mersûm Yakovaki zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 26 L sene 1246 Şuhûdü’l-hâl: Eş-şâhidûnü’s-sâbikūn