İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 106 Hüküm no: 66 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Dimitri’nin uhdesindeki gedik hisselerini Ziso v. Visa’ya sattığı Bakkāl Âsitâne-i aliyye’de vâki‘ bakkāl tâifesinden Dimitri v. Kostandi nâm zimmî meclis-i şer‘-i hatîrde yine tâife-i mersûmeden işbu hâmilü’r-rakīm Ziso v. Viset nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Yedikulekapısı Meydanı’nda Irgatpazarı nâm mahâlde vâki‘ Karabaş dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yüz beş sehmi sagīr Yordan ve sagīre Fotina ve Yefşimano’nun ve mâ‘adâ on beş sehmi akd-i âti’z-zikrin sudûruna değin bâ-hüccet-i şer‘iye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum on beş sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile ve bâ-izn-i şürekâ mersûm Ziso zimmîye altı yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr altı yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûr[un] tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm hisse-i mezkûrede benim aslâ ve kat‘â alâka ve medhalim kalmayıp müşteri-i mersûm Ziso zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 10 L sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Kabzımâl Dimitri, Yazıcı Filibos, Ustabaşı Nikola, Ustabaşı Yani, Ustabaşı Ananosti.