İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 106 Hüküm no: 67 Orijinal metin no: [13a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eleniko bt. Kosta’nın uhdesindeki gedik hisselerini Ligori v. İstavri’ye sattığı Bakkāl Âsitâne-i aliyye’de vâki‘ bakkāl tâifesinden kendi nefsinden asıl ve li-ebeveyn kız karındaşı olup vilâyet-i Rumeli’de Yenişehir-i fener kazâsına tâbi‘ Yortarpa karyesinde mütemekkine Eleniko bt. Kosti nâm Nasrâniye tarafından husûs-ı âti’l-beyânda vekîl olduğu şahs-ı mersûmeyi bilir Bakkāl Yani v. Tanaş ve Bakkāl diğer Yani v. Nikola nâm zimmîler şehâdetleriyle ber-nehc-i şer‘î sâbit olan Kiryako nâm zimmî meclis-i şer‘-i hatîrde yine tâife-i mersûmeden işbu bâ‘isü’s-sifr Ligori v. İstavri nâm zimmî muvâcehesinde bi’l-asâle ve bi’l-vekâle ikrâr-ı tâm ve takrîr-i kelâm edip mahmiye-i mezbûrede Sultanahmed Câmi‘-i şerîfi kurbünde Servidibi nâm mahâlde kâin Hacı Himmet dükkânı denmekle arîf bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla yetmiş beş sehmi mersûm Ligori zimmînin ve ma‘adâ kırk beş sehmi akd-i âti’z-zikrin sudûruna değin benim ve kız karındaşım ve müvekkilem mesfûrenin yedimizde ırsen bâ-hüccet-i şer‘iye mülkümüz olmağla gedik-i mezkûrdan ben ve kız karındaşım ve müvekkilem mersûmenin ber-minvâl-i muharrer mâlik olduğumuz kırk beş sehm hisseyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Ligori zimmîye iki bin yedi yüz elli guruşa bi’l-asâle ve bi’l-vekâle bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr iki bin yedi yüz elli guruşu bana tamâmen def‘ ü teslîm ve ben dahi yedinden bi’l-asâle ve bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle ibrâ ve iskāt ve her birimiz ber-minvâl-i muharrer âharın ibrâsını asâleten ve vekâleten kabûl eyledik fî-mâ ba‘d hisse-i mezkûrede benim ve kız karındaşım ve müvekkilem mersûmenin aslâ ve kat‘â alâka ve medhalimiz kalmayıp mecmû‘-ı gedik-i mezkûr müşteri-i mersûm Ligori zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a [bi’t-taleb ketb olundu] Fî 10 Şevvâl sene 1246 Şuhûdü’l-hâl: Eş-şâhidûnü’s-sâbikūn