İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 113 Hüküm no: 77 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Salih Ağa’nın sahibi olduğu berber gediğini Hatice Hatun ile Hüseyin Ağa’ya sattığı Berber Mahmiye-i İstanbul’da Daltaban kurbünde Kâtib Sinan mahallesinde sâkin berber esnâfından Mehmed Salih Ağa b. Mustafa meclis-i şer‘-i şerîf-i enverde işbu bâ‘isü’l-kitâb kendi nefsinden asıl ve vâlidesi zâtı mu‘arrefe Hadice Hatun bt. İbrahim tarafından husûs-ı âti’l-beyânda tasdîka vekîl-i şer‘îsi Berber es-Seyyid Hüseyin Ağa b. es-Seyyid Ömer mahzarında ikrâr-ı tâm ve takrîr-i kelâm edip mahmiye-i mezbûrede Sultan Bayezid-i Velî Han Câmi‘-i şerîfi avlusunda Hancı Ali Ağa ve Hadice Hatun’un berber dükkânları beynlerinde kâin şehriye beş guruş kirâ-i kadîmeli bir bâb berber dükkânı derûnunda mevcûde Başmuhâsebe Kalemi’nde Abdi Usta ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile asıl ve müvekkile-i mezbûreye ale’l-iştirâki’s-seviyy dokuz bin guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr dokuz bin guruşu bana tamâmen def‘ ü teslîm ben dahi yedlerinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteriyân-ı asıl ve müvekkile-i mezbûrân Hadice Hatun ve es-Seyyid Hüseyin Ağa’dan her birinin ber-vech-i iştirâk mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 10 Zilka‘de sene 1246 Şuhûdü’l-hâl: Kethüdâvekîli el-Hâc İbrahim Ağa, Şeyh Mustafa Efendi, Du‘âcı İsmail Efendi, Yiğitbaşı el-Hâc Mehmed Nuri, Çavuş el-Hâc Abdurrahman Ağa, Köşe Usta[sı] el-Hâc Selim Ağa.