İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 114 Hüküm no: 78 Orijinal metin no: [15a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simitçi Simo’nun uhdesindeki gedik hisselerini Ali Ağa’ya sattığı Davudpaşa’da çörekçi ve simitçi Mahmiye-i İstanbul’da Samatya kurbünde Hacı Hüseyin Ağa mahallesinde mütemekkin Simitçi Simo v. Dimo nâm zimmî meclis-i şer‘-i hatîrde işbu bâ‘isü’l-kitâb Hatibzâde Uncu es-Seyyid Ali Ağa b. el-Hâc Hasan Ağa mahzarında ikrâr-ı tâm ve takrîr-i kelâm edip mahmiye-i mezbûrede Davudpaşa İskelesi nâm mahâlde ha[mâ]m ittisâlinde kâin bir bâb çörekçi ve simitçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Abdi Usta’nın ve mâ‘adâ altmış sehmi dahi akd-i âti’z-zikrin sudûruna değin bâ-hüccet-i şer‘iye yedimizde iştirâken mülkümüz olmağla gedik-i mezkûrdan ben ber-minvâl-i muharrer mâlik olduğum altmış sehm hisse-i şâyi‘amı tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim mezbûrun izn ü icâzetiyle merkūm es-Seyyid Ali Ağa’ya iki bin üç yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr iki bin üç yüz guruşu bana tamâmen def‘ ü teslîm ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrun hisse-i şâyi‘asında benim aslâ ve kat‘â alâka ve medhalim kalmayıp müşteri-i merkūm es-Seyyid Ali Ağa’nın mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î bi’t-taleb ketb olundu. Fî 21 Şevvâl sene 1246 Şuhûdü’l-hâl: Bahçekapılı İbrahim Usta b. Ahmed, Mütevellî es-Seyyid Ahmed Usta b. Mustafa Alacahamamlı Hüseyin Usta b. Hüseyin, Çarşambalı el-Hâc Feyzullah Usta b. Hüseyin, Odacı Hüseyin Çelebi.