İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 115 Hüküm no: 79 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Marko v. Palo’nun uhdesindeki gedik hisselerini Yakof v. Yuvan’a sattığı Balat’da çörekçi Mahmiye-i İstanbul’da Çarşambapazarı civârında Derviş Ali mahallesinde mütemekkin Marko v. Palo nâm zimmî meclis-i şer‘-i hatîrde simitçi esnâfından işbu bâ‘isü’s-sifr Yakof v. Yuvan nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Balatkapısı dâhilinde hamam külhanı karşısında kâin ma‘lûmü’l-hudûd bir bâb çörekçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi mersûm Yakof zimmînin ve mâ‘adâ altmış sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde iştirâken mülkümüz olmağla gedik-i mezkûrdan ben ber-minvâl-i muharrer mâlik olduğum altmış sehm hissemi tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mersûm Yakof zimmîye beş bin guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş bin guruşu bana tamâmen def‘ ü teslîm ben dahi yedinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d hisse-i gedik-i mezkûrda benim aslâ ve kat‘â alâka ve medhalim kalmayıp mecmû‘u müşteri-i mersûm Yakof zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 12 Za sene 1246 Şuhûdü’l-hâl: Muhzırlar Kethüdâsı İsmail Ağa, Odacı Hüseyin Çelebi, Yiğitbaşı Molla İsmail. Hasan Paşa Hanı’nda Yani v. Yorgi, Kumkapı’da Kadırga v. Nikola, Koska’da Mihal v. Yani