İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 121 Hüküm no: 85 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Andon’un sahibi olduğu gedik hisselerini Tanaş ile Elisa’ya sattığı Bakkāl Âsitâne-i aliyye’de vâki‘ bakkāl tâifesinden Andon v. Dayic nâm zimmî meclis-i şer‘-i hatîrde tâife-i mersûmeden işbu bâ‘isü’s-sifr Tanaş v. Tarpandafil nâm zimmî ile şahsı mu‘arrefe Elisavit bt. Kostandi nâm Nasrâniyenin li-ebeveyn er karındaşı ve tarafından husûs-ı âti’l-beyânda tasdîka vekîl-i şer‘îsi Bakkāl Dimitri nâm zimmî muvâcehelerinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Narlıkapı dâhilinde vâki‘ Mirza dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla altmış sehmi Bakkāl Dimitri zimmînin ve bâkī altmış sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum altmış sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîkim mersûmun izniyle mersûm Tanaş zimmî ile müvekkile-i mersûme Elisavit Nasrâniyeye ale’l-iştirâki’s-seviyy iki bin yedi yüz guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr iki bin yedi yüz guruşu bana tamâmen def‘ ü teslîm ben dahi <> yedlerinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d hisse-i mezkûrede benim aslâ ve kat‘â alâka ve medhalim kalmayıp müşteriyân-ı mersûmân Tanaş zimmî ve Elisavit Nasrâniyenin iştirâken mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî-gurreti Za sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako, Ustabaşı Ananosti, Yazıcı Filibos, Kabzımâl Dimitri.